काठमाडौं । गैरआवासीय नेपाली सङ्घको नयाँ नेतृत्वका लागि भएको निर्वाचन प्रक्रियाअन्तर्गत केहीबेरअघि मतदान सकिएको छ । बिहान १० बजेदेखि सुरु भएको मतदान साँझ ६ बजेसम्म चलेको थियो । शान्तिपूर्ण रुपमा मतदान सकिएको र केहीबेरपछि मतगणना सुरु हुने सङ्घका महासचिव बद्री केसीले जानकारी दिए ।
निर्वाचनमा सुरुमा विद्युतीय मेशिनबाट मतदान हुने भनिए पनि विवाद भएपछि मतपत्र प्रयोग गरिएको थियो । जम्मा २३४१ मत खसेका थियो । जसमा २६१ अमेरिकी, ९२० युरोपेली, मध्यपूर्व ४७०, ओसेनीया २१४, एसिया ४७० र अफ्रिकी एनआरएनएले मतदान गरेका थिए । निर्वाचनको मतपरिणाम राति २ बजे आउने जनाइएको छ ।
निर्वाचनमा ४२ पदका लागि ७६ जना प्रतिस्पर्धी रहेका छन् । नयाँ नेतृत्वका लागि अध्यक्षमा कुमार पन्त र कुल आचार्यबीच प्रतिस्पर्धा भइरहेको छ भने महासचिवमा जानकी गुरुङ र डा हेमराज शर्माले उम्मेदवारी दर्ता गराएका थिए । निर्वाचनले दुई वर्षका लागि ४२ सदस्यीय कार्यसमिति चयन गर्नेछ ।
निर्वाचनमा करीब दुई हजार ५०० मतदाता रहेका छन् । यसैबीच पूर्वनिर्धारित कार्यतालिकाअनुरुप आज साँझ हुने भनिएको सङ्घको समापन समारोह नहुने भएको छ । मतगणनाको परिणामपश्चात् मात्रै समापन कार्यक्रम गरिने आयोजकले जनाएको छ ।