काठमाडौं । सत्तारुढ दल नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले आफूहरुलाई ग्यास्टि«क र अल्सर भए पनि उपचारै नहुने क्यान्सर नभएको बताएका छन् । बिहीबार गृहजिल्ला चितवनमा आयोजित चियापानमा बोल्दै अध्यक्ष दाहालले आफूहरुलाई धुलोमैलो लागे पनि कामै नलाग्ने पनि भइनसकेको बताए ।
उनले भने, “हामीलाई कामै नलाग्ने गरी क्यान्सर भएको छैन । उपचार नै नलाग्ने गरी क्यान्सर भएको भन्न खोजेको होइन । ग्यास्टि«क, अल्सर त्यतिसम्म होला क्यान्सर भएको छैन । त्यसको उपचार छ । बेलैमा उपचार गरौं ।” त्यस्तै उनले देशभरका प्रतिगामी आएर खेल्ने ठाउँ चितवन हुने त होइन भन्ने डर रहेको पनि बताए ।
कम्युनिष्ट नेता,कार्यकर्ताहरु आदर्शबाट स्खलित हुँदै जान थालेको उनले बताए । उनले सोभियत संघ र पूर्वी यूरोपका समाजवादी थुप्रै देशहरु आफ्नै कारण विघघटन भएको स्मरण गर्दै नेपालको कम्युनिष्ट आन्दोलनमा पनि भित्रैबाट खतरा रहेको बताए ।
दाहालले पार्टीभित्रै अराकजकता जन्म दिने, स्वार्थी तत्व र गुट विकसित हुन थालेको भन्दै चिन्ता समेत व्यक्त गरे । सत्तामा पुगेपछि कम्युनिष्टमा आदर्श विर्सने रोग रहेको दाहालको भनाइ थियो ।