नेपालको राजकीय भ्रमणमा आउन लागेका चीनका राष्ट्रपति सी चिनपिङको भव्य स्वागतका लागि काठमाडौंका मुख्य सडकहरू भव्यरूपमा सिंगारिएका छन् । नेपालका राष्ट्रपति विद्यादेवी भण्डारी स्वयंले विमानस्थलमै पुगेर राष्ट्रपति सीको स्वागत गर्ने कार्यक्रम छ । नेपालले देखाउने हार्दिकता यस्तै हो । सहरमा बनाइएको स्वागत द्वारको भव्यता वा संख्याले हैन नेपाली पक्षले देखाउने हार्दिकता र विश्वासले चिनियाँ मित्रहरूको मन जित्नसक्छ । चीनका राष्ट्रपति आउँदा संसारको ध्यान स्वाभाविकरूपमा काठमाडौंमा केन्द्रित हुन्छ । नेपालका शासकहरू अलिकति पनि चुके भने संसारभर तत्तकालै गलत सन्देश जानेछ । यसैले समयको पालना लगायतमा सबैले विशेष ध्यान दिऊन् । नेपालका सबै राजनीतिक शक्तिहरूको चीनप्रति सद्भाव रहिआएको छ । सरकारप्रतिको रिस मित्रहरूमाथि पोख्नु आत्मघाती मूर्खता हुन्छ भन्ने विपक्षले पनि हृदयंगम गर्नुपर्छ । चीनसँगको मित्रता नेपालको राष्ट्रिय हितका लागि अमूल्य छ । कसैले पनि चीनसँगको मित्रतालाई सहयोगका सम्झौतामा आधारमा आकलन गर्नु हुँदैन । सहयोगको अंकसँग चिनियाँ सद्भावको तुलनै हुनसक्तैन । नेपाली पक्षले महत्त्वाकांक्षीभन्दा व्यावहारिक भएर सहयोगका सम्भावनालाई हेर्नुपर्छ । चीनका राष्ट्रपतिको २३ वर्षपछि नेपाल भ्रमण भएको छ । आशा गरौँ, अब नेपाल यसरी ओझेलमा पर्नेछैन । 

सत्तारुढ दलका नेताहरू नेपाल कम्युनिस्ट पार्टी (नेकपा)को चीनसँग विशेष निकटता देखाउने होडबाजीमा लागेका छन् । चीनको सहयोग र राष्ट्रपति सीको नेपाल भ्रमणलाई नेपाल कम्युनिस्ट पार्टीको विशेष उपलब्धिका रूपमा प्रचार गर्न थालिएको छ । नेपालमा पनि कम्युनिस्ट पार्टी सत्तामा भएकाले राष्ट्रपति सी भ्रमण र सहयोग भएको भ्रम फैलाउनु नेपालका लागि मात्र हैन चीनकै लागि पनि प्रत्युत्पादक हुनेदेखिन्छ । अहिलेसम्म नेपालमा चीनप्रति सबै राजनीतिक दल र समूहको विश्वास र सद्भाव रहेको देखिएको छ । चीन सरकार नेपाल कम्युनिस्ट पार्टीसँग मात्र निकट भएको सन्देश दिइँदा गैरकम्युनिस्टहरू झस्किन सक्छन् भने चीन पनि विवादमा पर्न सक्छ । नेपालको राजनीतिक स्थिरता र अन्तर्राष्ट्रिय परिस्थितिले राष्ट्रपति सीको भ्रमणको साइत अहिले जुरेको हो । यसैले राष्ट्रपति सीको भ्रमणको श्रेयको पगरी गुथ्न खोज्नु लज्जास्पद मूर्खता हुनेछ ।  

राष्ट्रपति सी भारत भ्रमण सकेर नेपाल आएका हुन् । चीन र भारतका सरकार प्रमुखहरूबीच नेपालका सम्बन्धमा पनि छलफल भएको हुनसक्छ । छलफलमात्र हैन विगतमा नेपाली भूभागको प्रयोगका सम्बन्धमा चीन र भारतबीच सम्झौता भएको उदाहरण समेत छ । नेपाली भूभागको प्रयोग सम्बन्धमा नेपालकै उपस्थितिविना सम्झौता गरिनु सामान्य कूटनीतिक त्रुटिमात्र अवश्य पनि होइन । यस्तो आपत्तिजनक अभ्यासको स्पष्ट प्रतिवाद नहुने हो भने नेपालको सार्वभौमसत्ताको उपेक्षा हुने परम्परा स्थापित हुनसक्छ । तर, भारतबाट आएका समाचारहरूमा दुवै सरकारका प्रमुखहरूको वार्ता ‘आतंक र कट्टरतावाद’को नियन्त्रणमा केन्द्रित भएको जनाइएको छ । यसैले स्पष्ट उदाहरण नदेखिँँदासम्म राष्ट्रपति सी र भारतका प्रधानमन्त्री नरेन्द्र मोदीबीच नेपालको अहित हुने विषयमा कुनै सहमति वा मोलतोल भयो होला भनेर लख काट्नु उचित पनि हुँदैन । कुनै अमूर्त विषय उठाएर सरकारलाई शंकाको घेरामा पार्न खोज्नु राष्ट्रको हितका हुँदैन । यद्यपि, आफ्नो अहित नहोस् भनेर चनाखो हुनुपर्ने त नेपालीले नै हो । 

मित्रराष्ट्र चीनका राष्ट्रपति सीलाई हार्दिक स्वागत तथा अभिवादन !