काठमाडौं । नेपाली राष्ट्रिय फुटबल टोलीले बिहीबार अस्ट्रेलियासँग खेल्दैछ । विश्वकप फुटबल छनोटको समूह चरणको खेलमा नेपाली बलियो मानिएको टोलीसँग खेल्न लागेको हो । 

अस्ट्रेलियाको क्यानबेरास्थित जीयो रंगशालामा हुने खेल नेपाली समयअनुसार दिउँसो २ बजेर ४५ मिनेटमा सुरु हुँदैछ । सन् २०२२ मा कतारमा हुने फिफा विश्वकप फुटबलको एशियाली छनोट प्रतियोगितामा नेपाल अस्ट्रेलियाको होममा खेल्न लागेको हो । 

एसियन च्याम्पियन अस्ट्रेलियासँग भने नेपालले अहिलेसम्म सिनियर स्तरमा खेलेको छैन । यसअघि विश्वकप छनोट चरणको पहिलो खेलमा कुवेतसँग ७–० अन्तरले पराजित भएको नेपाली टोलीले दोस्रो खेलमा भने पुनरागमन गर्दै चाइनिज ताइपेइलाई २–० ले पराजित गरेको थियो । 

जितको लक्ष्यसहित अस्ट्रेलिया जान लागेको टोलीको कप्तानीको जिम्मेवारी गोलकिपर किरण चेम्जोङलाई दिइएको छ । टोलीको गोलकिपरमा किरणसँगै विकेश कुथु, विशाल श्रेष्ठ छन् । डिफेन्डरमा सरोज दाहाल, अजित भण्डारी, दिनेश राजवंशी, अनन्त तामाङ, देवेन्द्र तामाङ, रन्जित धिमाल, सुमन अर्याल छन् । 

मिडफिल्डमा रोहित चन्द, सुनिल बल, रवि पासवान, अन्जन विष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ, विशाल राई छन् । स्टाइकरमा विमल घर्तीमगरसँगै अभिषेक रिजाल र नवयुग श्रेष्ठ छन् । 

नेपालले अस्ट्रेलियापछि असोज २८ गते जोर्डनसँग प्रतिस्पर्धा गर्नेछ । यता नेपाल रहेको समूह बीको अंकतालिकामा कुवेत शीर्ष स्थानमा रहेको छ । दुई खेलबाट नेपालविरुद्ध जित निकाल्दै गोलअन्तरका आधारमा कुवेत अस्ट्रेलिया अगाडि रहेको हो । अस्ट्रेलियाले भने कुवेतलाई ३–० गोलले हराएको थियो । समूहको तेस्रो स्थानमा रहेको जोर्डनको ३ अंक छ । उसले चाइनिज ताइपेइलाई २–१ ले हराएको हो । 

समूहको पाँचौं स्थानमा नेपाल रहँदा सबै खेल गुमाएको चाइनिज ताइपेइ पुछारमा छ । 

यस्तो छ सम्भावित प्लेइङ ११

प्रशिक्षक योहान कोलिनले चाइनिज ताइपेइविरुद्ध जित निकालेको टोलीलाई नै खेलाउने सम्भावना रहेको छ । किरण चेमजोङ, रञ्जित धिमाल, देवेन्द्र तामाङ, दिनेश राजवंशी, अनन्त तामाङ, सुजल श्रेष्ठ, रोहित चन्द, अन्जन विष्ट, विशाल राई, रवि पासवान, विमल घर्तीमगर 

प्रशिक्षकः योहान कोलिन 
फर्मेसनः ४–५–१