काठमाडौं । साहित्यकार सञ्जीव उप्रेतीको नयाँ उपन्यास ‘हंस’ यस वर्षको विजया दशमीको संघारमा सार्वजनिक हुने भएको छ । १२ वर्षअघि ‘घनचक्कर’ उपन्यास प्रकाशनपछि बौद्धिक श्रष्टाको उपमा पाएका उप्रेती यो उपन्यास भने सरल र सहज भाषाशैलीमा लेखेको बताएका छन् ।
२५ वर्ष त्रिभुवन विश्वविद्यालयको अंग्रेजी केन्द्रीय विभागमा प्राध्यापन गरेका उप्रेतीले यो उपन्यासमा पर्यावरणीय संकट र मानवेत्तर प्राणीका कथालाई मानवीकरण गर्दै मानवकेन्द्रित विश्व दृष्टिलाई विस्थापन गर्ने कोसिस गरेका छन् ।
“प्रकृतिलाई मूर्तरुपमा बुझ्नुपर्यो भनेर चरा र मान्छेका सम्बन्धको कथा लेखेको हुँ । उपन्यासमा चराको भाषा र संवादलाई समेत प्रयोगात्मकरुपमा प्रस्तुत गर्ने कोसिस गरेको छु,” उनले भने । चरामा समर्पित १२ खण्डमा विभाजित छ हंस । प्रकाशन गृह
बुक–हिलका अध्यक्ष भूपेन्द्र खड्का भन्छन्, “हंसले नेपाली आख्यान लेखनमा स्तरीयताको प्रतीक्षा गरिरहेका पाठकको अपेक्षालाई पूर्ति गर्नेछ । साथै, आख्यान क्षेत्रका निम्ति पनि यो उपन्यास मानक
बन्नसक्छ ।”
२३२ पृष्ठको उपन्यासको मूल्य ४ सय रुपैयाँ राखिएको छ । उपन्यास यही असोज ११ गते शनिबार सार्वजनिक हुने भएको छ ।
