पोखरा । विश्व पर्यटन दिवसमा पोखरा आउने पर्यटकलाई बाजा बजाउँदै फूलमालाले स्वागत गरिने भएको छ । सेप्टेम्बर २७ अर्थात, असोज १० गते पहिलो फ्लाइटबाट पोखरा भित्रिने पर्यटकलाई विमानस्थलमा नै पुगेर स्वागत गर्ने तयारी पोखराका पर्यटनसम्बद्ध विभिन्न संघसंस्थाहरुले गरेका छन् । सडकमार्गबाट भित्रिने पर्यटकलाई पनि बसपार्कमा नै पुगेर आतिथ्यतासहित स्वागत गरिनेछ ।

पर्यटकहरुलाई स्वागतपश्चात सोही दिन रेष्टुरेण्ट एण्ड बार एसोसिएसन नेपाल (रेबान) कास्कीले एकदिने सडक महोसत्वको आयोजना समेत गरेको छ । पर्यटकलाई स्वागत गर्ने र महोत्सवमा सहभागी गराउने, संस्कृति प्रदर्शन गर्ने र पर्यटन प्रबर्द्धन गर्ने लक्ष्यका साथ महोत्सवको आयोजना गरिएको हो ।

उता, गण्डकी प्रदेश सरकारले आन्तरिक पर्यटन वर्ष २०१९ अन्तर्गत सोही दिन सुनौली नाकामा पुगेर नेपाल भित्रिने पर्यटकहरुलाई स्वागत गर्ने कार्यक्रम रहेको छ । आन्तरिक पर्यटन प्रबरद्धन गर्न असोज ९ देखि गण्डकी प्रदेश सरकारले प्रदेश नं. ५, ३, २  र १ मा पुगेर सेल्स मिसन कार्यक्रम गर्दैछ । जसको नेतृत्व स्वयम् विभागीय मन्त्री विकास लम्सालले गर्दैछन् ।

५० जनाको सहभागितामा अन्तरप्रादेशिक पर्यटन प्रबर्द्धनसँगै पोखरामा भने सडक महोत्सव कार्यक्रमको आयोजना गरिएको हो । “सडकमै खाऔँ, सडकमै रमाऔँ” नारासहित आन्तरिक पर्यटन प्रबर्द्धन गर्ने लक्ष्य लिइएको रेबान पोखराका अध्यक्ष भिमसेन भुजेलले जानकारी दिए ।

उक्त दिन पोखराको लेकसाइडस्थित बाराहीचोकदेखि फिस्टेल गेटसम्मको सडकमा महोत्सव सञ्चालन हुनेछ । महोसत्वमा सांस्कृतिक कार्यक्रमको अलावा विभिन्न परिकारका खाद्यान्न समेत सडकमा नै उपलब्ध हुनेछन् । “पर्यटन र रोजगार सबैका लागि राम्रो भविष्य” नारासहित ४० औँ विश्व पर्यटन दिवस आगामी शुक्रबार विश्वभर मनाईँदैछ ।

महोत्सव अवधिमा साँझ ५ बजेबाट राति ११ बजेसम्म पर्यटकलाई नेपाली साँस्कृतिक झाँकी, वृत्तचित्र प्रदर्शनीलगायतका मनोरञ्जनात्मक कार्यक्रम गरिने कार्यक्रम संयोजक सूर्य भुजेलले जनाए ।

महोत्सव परिसरको क्षेत्रलाई नो भेहिकल जोन समेत घोषणा गरिएको छ । महोत्सवमा आउने पर्यटकहरुले राष्ट्रिय तथा अन्तर्राष्ट्रिय परिकार, जातीय तथा धार्मिक संस्कृति सहितको कार्यक्रम, लाईभ ब्याण्ड, पञ्चेबाजा, गन्दर्भ गायनको समेत मनोरञ्जन लिन पाउनेछन् ।

पहिलो फ्लाइटबाट पोखरा भित्रिने तीन पर्यटकलाई बाजागाजासहित स्वागत गर्दै तीनजना पर्यटकलाई प्याराग्लाइडिङ, हाइकिङ, पोखराको दृश्यावलोकन र डिनर निशुल्क प्रदान गरिने पोखरा पर्यटन परिषदका अध्यक्ष चिरञ्जिवी पोखरेलले बताए ।