पोखरा । तरुण दलका महासचिव भूपेन्द्रजंग शाहीलाई साईबर क्राइमको मुद्दा लगाइने भएको छ । शनिबार पोखरामा तरुण दलका कार्यकर्तासँग कुरा गर्दै अध्यक्ष जीतजंग बस्नेतले संगठनलाई बिगार्नमा उद्धत भएको हुँदा महासचिव शाहीलाई बर्खास्ती गरिएको र महासचिव रिक्त रहेको बताए ।
यस्तै, उनले सामाजिक सञ्जालबाट व्यक्तिगत प्रतिष्ठामा आँच आउनेगरि झुठा आरोप लगाएको हुँदा त्यसको विरुद्धमा कानूनी उपचारमा जाने तयारी भइरहेको बताए ।
तरुण दलका अध्यक्षले आर्थिक अपचलन गरेको आरोपसमेत शाहीले लगाएका थिए । उक्त आरोपका कारण सामाजिक प्रतिष्ठामा आँच आएको र आफूलाई दोषी देखाईएको हुँदा त्यसको विरुद्धमा कानूनी लडाई लड्ने बस्नेतले बताएका हुन् ।
शाहीको बर्खास्तीबारे पार्टीका सभापतिदेखि वरिष्ठ नेताहरुलाई जानकारी गराएरै उनीहरुको सहमतिमा पदमुक्त गरिएको उनले बताएका छन् ।
“सहमतिमै उहाँलाई बर्खास्त गरिएको छ, तरुण दलमा महासचिव छैन, संगठन बिगार्नेहरुलाई सभापति सहितका नेताहरुको सहमतिमै हटाइएको हो, तरुण दल अब पहिलेकै अवस्थामा आउँछ, म सबै तरुण साथीहरुलाई के आग्रह गर्दछु भने, तपाईहरु ढुक्क भएर संगठनमा लाग्नुस,” उनले भने ।
नेपाली कांग्रेसको जागरण अभियान चलिरहेको बेलामा पार्टीको भातृसंगठनको किचलोले जागरण अभियान नै प्रभावित भएको भन्दै कार्यकर्ताहरुले बस्नेतसमक्ष सत्यतथ्य बताउन आग्रह गरेका थिए । कार्यकर्ताको गुनासोपछि बस्नेतले तरुण दलमा रिक्त महासचिव छिटै नियुक्त गरिने र संगठनको छवि र प्रभाव पहिलेजस्तै बनाइने प्रतिबद्धता व्यक्त गरे ।
बर्खास्तीअघि महासचिव शाहीले व्यक्तिगत रुपमा भेट्न भनेता पनि आफूले व्यक्तिगत रुपमा नभेट्ने र सार्वजनिक रुपमा नै भेटघाट गरिने जवाफ दिएको बताए ।
गएको भदौ २८ गते दलका अध्यक्ष र महासचिवले एकपछि अर्को विज्ञप्ति निकाल्दै एकअर्कालाई बर्खास्ती गरिएको जानकारी दिएका थिए ।
बर्खास्तीबारेका २ विज्ञप्तिको बारेमा भ्रममा नपर्न आग्रह गर्दै उनले महासचिवलाई मात्र बर्खास्त गरिएको र यसअघिका तरुण दलका कारवाही पनि यथावत नै रहेको प्रष्टीकरण दिए ।
तरुण दलभित्रको किचलोपछि पहिलोपटक पोखरा आएका बस्नेतले सबै तरुणहरु एक भएर अगाडि बढ्न आग्रह समेत गरे । अध्यक्ष बस्नेतको भनाइलाई कास्की तरुण दल अध्यक्ष मनोज गुरुङ, पर्वत तरुण अध्यक्ष तोरण मल्ल ठकुरी ‘राज’ ले समेत समर्थन गरेका थिए ।