काठमाडौं । हरिप्रसाद कल्याणी रिमाल नाट्यसङ्गीत प्रतिष्ठान काठमाडौंले नेपाली नाट्य क्षेत्र र संगीतका अथक साधक हरिप्रसाद रिमालको ९५औं जन्म जयन्तीका अवसरमा नाट्य, संगीत तथा सञ्चार क्षेत्रका विभिन्न व्यक्तित्वलाई पुरस्कृत तथा सम्मानित गरेको छ ।

काठमाडौंको नाचघरमा विहिबार आयोजित एक कार्यक्रममा प्रमुख अतिथि संस्कृति, पर्यटन तथा नागरिक उड्डयन मन्त्री योगेश भट्टराईले सम्पूर्ण सम्मानित व्यक्तित्वहरूलाई सम्मानित एवम् पुरस्कृत गरे ।

प्रतिष्ठानले २०७४–०७५–०७६ सालको हरिप्रसाद कल्याणी रिमाल नाट्यसंगीत पुरस्कार क्रमशः चलचित्रकर्मी यादव खरेल, संगीतकार दीपक जङ्गम र नाट्यकर्मी शकुन्तला शर्मालाई प्रदान गरेको छ । त्यस्तै प्रतिष्ठानले २०७४–०७५–०७६ सालको हरिप्रसाद कल्याणी रिमाल सञ्चारसेवा सम्मानबाट क्रमशः सञ्चारकर्मी भारती सिलवाल गिरी, निरोधराज पाण्डे र पुरु रिसाललाई सम्मानित गरेको छ ।

प्रतिष्ठानले २०७६ सालदेखि दुई व्यक्तिलाई पपुलर सञ्चारकर्मी र नाट्यकर्मीका रुपमा पुरस्कृत गर्ने घोषणा गर्दै भूषण दाहाल र वीरेन्द्र हमाललाई पुरस्कृत गरेको छ । उक्त पुरस्कारको नगद राशी २५ हजार १११ रुपैयाँ रहेको छ भने सम्मानको राशी २१ हजार १११ रुपैयाँ रहेको छ । 

सोही अवसरमा सांस्कृतिक संस्थानले माथिको सानो हल नाट्यकर्मी हरिप्रसाद रिमालको नाममा नामाङ्कित गर्दै ‘हरिप्रसाद रिमाल प्रेक्षालय’ नाम दिएको छ । कार्यक्रममा प्रमुख अतिथि संस्कृति मन्त्री योगेश भट्टराईले हरिप्रसाद रिमालको कर्मशीलताको प्रशंसा गर्दै मन्त्रालयले प्रतिष्ठानलाई सहयोग गर्ने वचन दिए । कार्यक्रममा प्रा.डा. हेमचन्द्र नेपालले पुरस्कृत तथा सम्मानित व्यक्तिहरूका बारेमा बोलेका थिए ।

प्रतिष्ठानका अध्यक्ष नाट्यकर्मी प्रचण्ड मल्लको सभापतित्वमा सम्पन्न कार्यक्रममा विभिन्न वक्ताहरूले बोलेका थिए ।