काठमाडौं । सत्तारुढ नेपाल कम्युनिस्ट पार्टी (नेकपा) को भ्रातृ संगठन राष्ट्रिय युवा संघ, नेपालका अध्यक्ष रामप्रसाद सापकोटा ‘दीपशिखा’ ले स्थानीयबाहेकका विषयहरुमा मनोमानी रुपमा धारणा सार्वजनिक नगर्न संगठनका जिल्ला शाखाहरुलाई निर्देशन दिएका छन् । विभिन्न जिल्लाले ज्ञानेन्द्र शाहीलाई राजावादीको बिल्ला भिराएर विभिन्न जिल्ला प्रवेशमा लगाइएको रोकको चौतर्फी आलोचना हुन लागेपछि अध्यक्ष दीपशिखाले जिल्ला शाखाहरुलाई ट्विटरमार्फत् यस्तो आग्रह गरेका हुन् ।
“राष्ट्रिय युवा संघका कमरेडहरुलाई स्थानीय विषय बाहेक अन्य विषयहरूमा धारणा वा निर्णयहरू सार्वजनिक गर्नुपूर्व केन्द्र वा आफूभन्दा उपल्लो कमिटीसँग अनुमति लिनुहुन आग्रह गरिन्छ,” उनले ट्विट गर्दै भनेका छन् ।
केही दिनअघि बाँकेको राँझा विमानस्थलमा पर्यटन मन्त्री योगेश भट्टराईका कारण बुद्ध एयरको विमानले उडान ढिलो गरेपछि शाहीको समूहले विमानभित्र वादविवाद गरेको थियो । मन्त्री भट्टराईमाथि अभद्र व्यवहार गरेको भन्दै राष्ट्रिय युवा संघ, कास्कीले शाहीमाथि अनेक आरोप लगाउँदै जिल्ला प्रवेशमा रोक लगाएको भन्दै विज्ञप्ति जारी गरेको थियो ।
त्यस्तै धनुषा र दाङमा पनि सत्तारुढ नेकपाको युवा संगठनले शाहीलाई जिल्ला प्रवेशमा रोक लगाइएको घोषणा गरेका छन् ।
यो पनि पढ्नुस्
नेकपाको भ्रातृ संगठनले भन्यो– ज्ञानेन्द्र शाहीलाई कास्कीमा प्रवेश निषेध