एजेन्सी । अमेरिकाका इलिनोइस स्थित एक विद्यार्थी खेलाडीले इ–सिगरेट कम्पनी जुलमाथि मुद्दा हालेका छन् । डाक्टरहरुले भेपिङकै कारण उनको फोक्सो ७० वर्षको बूढो मान्छे जस्तो भएको बताएपछि उनले कम्पनीविरुद्ध उजुरी हालेका हुन् ।  १८ वर्षे एडम हेर्जेनरेडरले एक १ वर्ष ६ महिना जति इ–सिगरेट सेवन गरेका थिए र सानफ्रानसिक्कोस्थित अमेरिकाको सबैभन्दा ठूलो भेपिङ कम्पनी जुलको गलत प्रचारको शिकार भएको बताएका हुन् । 

यसरी स्वास्थ्यका धुम्रपानको विकल्पका रुपमा प्रचार गरिएको इ–सिगरेटले युवाहरुलाई यसको लतमा पारिरहेको छ । यस्तोमा हर्जेनरेडर गत महिनामा स्वासप्रस्वास सम्बन्धी समस्या र वाकवाकी लागेका कारण अस्पताल भर्ना भएका हुन् र त्यतिखेर देखि नै फोक्सोको उपचार गराइरहेका थिए । 
उनले सिकागोको डब्लुजीएन–टिभीसँग भनेका छन्, “त्यो सानो डिभाइसले मेरो फोक्सोलाई आज यस्तो अवस्थामा पुर्यायो भन्ने सोच पनि भयानक लागिरहेको छ । ”

उनी एक विद्यार्थी रेस्लर हुन् तर अब भने उनको फोक्सो पुनः पहिलेको अवस्थामा फर्किने निश्चित छैन । 

उनले दुःखी हुँदै भने , “यस्तो हुनु अगाडि म भार्सिटी रेस्लर थिएँ । तर अब मैले आफ्नो खेलमा फर्कने मौका कहिल्यै नपाउन सक्छु किनकी यो पूर्ण रुपमा शारीरिक खेल हो र मेरो फोक्सोले आवश्यक बल नधान्न सक्छ । यो मेरा लागि एकदम दुःखद् क्षण हो । ”

यसरी हर्जेनरेडर सहित अमेरिकामा सर्यौँलाई भेपिङकै कारण फोक्सो सम्बन्धी रोग लागेको छ भने छजनाको मृत्यु पनि भइसकेको छ । डाक्टरहरुका अनुसार यसका बिरामीहरुमा सास फेर्दाखेरी पुग्ने क्षति देखापरेको छ जुन कुनै अपरिचित पदार्थको प्रतिक्रियामा हुन सक्छ । यसको लक्षण सास फेर्न कठिनाइ हुने, थकान, छाति दुख्ने, पखाला लाग्ने, बान्ता हुने रहेका छन् । 

तर पनि अनुसन्धानकर्मीहरुले सो रोग उत्पन्न गराउने सिङ्गो विषाक्त पदार्थ वा उत्पादन पहिचान गर्न सकेका छैनन् । बुधबार मात्र राष्ट्रपति ट्रम्पले आफ्नो प्रशासनमा यसबारे गम्भीर छलफल भइरहेको भन्दै गम्भीर चिन्ता व्यक्त गरेका थिए ।  चुरोटको तुलनामा अधिक स्वस्थकर भनि प्रचार गरिएको इ–सिगरेट पछिल्लो समय युवाहरुमाझ अत्यन्तै लोकप्रिय बनेको थियो । तर अहिले भने स्वास्थ्य विद्हरुले सबैलाई यसको सेवनबारे सतर्क रहन चेतावनी दिइरहेका छन् । – फक्स न्युज