काठमाडौैं । नेपाल कम्युनिस्ट पार्टी (नेकपा)का अध्यक्ष पुष्पकमल दाहालले परिवर्तन विरोधी चलखेल बढेको भन्दै हत्केलाले सूर्य छेक्न खोज्नेको प्रतिवाद गर्न निर्देशन दिएका छन् ।
पार्टीका दिवङ्गत नेता पोष्टबहादुर बोगटीको स्मृति दिवसमा पार्टी कार्यालयमा आयोजित कार्यक्रममा उनले भने, “सबैभन्दा राम्रा छोराछोरीको बलिदानबाट ल्याएको हो यो परिवर्तन । जनतामा भ्रम सिर्जना गर्ने र हत्केलाले सूर्य छेकेजस्तो गर्नेसँग सतर्क रहने र त्यसको प्रतिवाद गर्नूस् ।”
उनले विकास र समृद्धिको बाटोबाट समाजवादको दिशा तय गरिएको बताउँदै पुँजीवाद र साम्राज्यवादबाट घेरिएकाले हिँड्न त्यति सहज नभएको बताए ।
“समाजवादको आधार तयार पार्न वैचारिक स्पष्टता, समर्पित, अनुशासित पार्टी सङ्गठन, लाखौं, करोडौं जनतालाई साथ लिएर हिँड्न सक्ने भरोसायोग्य पार्टी निर्माणको प्रक्रियामा छौं हामी । तर यो काम सजिलो छैन, निकै चुनौतिपूर्ण छ । चारैतिरबाट पुँजीवाद र साम्राज्यवाद, विभिन्न खालको आत्मकेन्द्रित, व्यक्तिवादी सोच, विभिन्न खालका विचलनबाट घेरिएका छौं,” उनले भने ।
स्मृति कार्यक्रममा प्रचण्डले पोष्टबहादुर बोगटीको व्यक्तित्वको पनि चर्चा गरे । बोगटी निर्भीक, उद्देश्यप्रति अविचलित र कामप्रति दत्तचित्त रहने नेता भएको स्मरण गर्दै ऊर्जा र पर्यटन मन्त्रालयको जिम्मेवारी सम्हाल्दा गरेका कामहरूको चर्चा गरे ।