काबुल । अमेरिका र तालिबानका बीचमा शान्ति वार्ता रद्ध भएपछि रुस अब तालिवानको नजिक जाने प्रयासमा लागेको छ । तालिवानको एक प्रतिनिधिमण्डल रुसी अधिकारीहरुसँग छलफलको लागि मस्कोमा पुगेर रुसी अधिकारीसँग सो प्रतिनिधिमण्डलले वार्ता पनि गरेको जनाइएको छ । कतारमा रहेका तालिवानका प्रवक्ता सुहैल शाहीनले यो बैठकको पुष्टि गरेका छन् ।
उनले बताएअनुसार अफगानिस्तानमा रुसका विशेष दूत जामिर कबुलोवका साथ तालिबानको प्रतिनिधिमण्डलको छलफल भएको थियो । यो भन्दा पहिला अमेरिका र तालिबानका बीचमा केही महिनादेखि शान्ति सम्झौताको चर्चा भइरहेको थियो ।
यसको एक प्रारुप पनि तयार भएको थियो । यो प्रारुपलाई अफगानिस्तानमा रहेका अमेरिकी दूत जलमय खलीलजादले अफगान राष्ट्रपति असरफ घानीको सामुन्नेमा राखेका थिए । तर, अचानक अमेरिकी राष्ट्रपति डोनाल्ड ट्रम्पले यो शान्ति संझौतालाई रद्ध गरिदिए । यो अवस्थामा रुस र तालिवानको प्रतिनिधिमण्डलबीच भेटवार्ता भएको हो । रुसको विदेश मन्त्रालयले तालिबानसँग दोस्रो पटक भेटका लागि पनि जोड दिएको रुसको सरकारी समाचार एजेन्सी तासले जनाएको छ । (बीबीसी)