काठमाडौं । प्रमुख प्रतिपक्षी दल नेपाली कांग्रेसको निरन्तरको अवरोधका कारण प्रतिनिभिसभाको बैठक भोलिसम्मलाई स्थगित भएको छ । कांग्रेसले बाँकेमा बिहीबार पार्टी जिल्ला सभापति किरण कोइरालामाथि भएको घटनालाई लिएर सदन अवरोध गरेको हो । 

आज १ बजे बसेको बैठकमा बाँके घटनाबारे गृहमन्त्री रामबहादुर थापाले जवाफ दिएका थिए । गृहमन्त्रीको जवाफ चित्त नबुझेको भन्दै कांग्रेसले बैठक अवरुद्ध गरेको हो । कांग्रेसको अवरोधका कारण सभामुख कृष्णबहादुर महराले सहमतिका लागि १० मिनेटलाई स्थगित गरेका थिए । झन्डै डेढ घण्टापछि बसेको दोस्रो बैठकमा पनि अवरोध कायम भएपछि सभामुख महराले बैठक भोलि दिउँसो तीन बजेसम्मलाई स्थगित गरेका हुन् ।