काठमाडौं । शनिबार बेलुका नेपालगञ्जबाट काठमाडौं आउने क्रममा विमानस्थलमा एकघण्टा बढी जहाज कुराएको भन्दै यात्रुले पर्यटनमन्त्री योगेश भट्टराईलाई गालीगलौज गरेका छन् । जहाजभित्रै रहेका केही युवाहरुले उनलाई गालीगलौज गरेका हुन् । मन्त्री भट्टराईले बुध्द एयरसँग आग्रह गरेर १५ मिनेट मात्रै ढिला भएको बताएका छन् ।

यात्रुले मन्त्रीलाई गालीगलौज गरेको भिडियो सामाजिक सञ्जालमा भाइरल भएको छ । काठमाडौं आउने जहाजलाई मन्त्रीले एकघण्टा कुराएर यात्रुलाई दुःख दिएको भन्दै मन्त्री भट्टराईलाई गालीगलौज गरिएको छ । “समयको ख्याल गर्नुपर्छ कि पर्दैन ? कहिले प्रधानमन्त्री आउने ढिला गरिदिने कहिले मन्त्रीले ढिला गरिदिने, तपाईंले यसको जवाफ दिनुपर्छ,”आक्रोशित यात्रुले भनेका छन् ।

उनीहरुले पञ्चायतकालमा जस्तै भएको बताएका छन् ।

मन्त्री भट्टराईले भने टीकापुरमा आयोजना भएको कार्यक्रम सकेर फर्किने क्रममा विमानस्थलमा केही व्यक्तिहरुले ३–४ जना व्यक्तिहरु आक्रामक शैलीमा आफ्ना विरुद्ध प्रस्तुत भएको बताएका छन् । उनले फेसबुकमा जवाफ दिँदै भनेका छन्– 

आज कैलाली जिल्लाको टिकापुरमा आयोजना भएको डलफीन महोत्सबको कार्यक्रम सकेर बुद्ध एयरको धनगढीको अन्तिम उडानबाट काठमान्डौ फर्कने मेरो योजना रहेको थियो । तर कार्यक्रम ढिला भएको कारण बुद्ध एयरसँग अनुरोध गरेर नेपालगंजको अन्तिम उडानबाट काठमान्डौ फर्कनेक्रममा केहि ढिला हुन गएको सत्य हो । सबै यात्रुको बोर्डिङ भएको करिब १५ मिनेटमा हाम्रो टिमको बोर्डिङ भएको हो । भोली प्रतिनिधिसभामा माननीयहरुको प्रश्नको मैले जबाफ दिने कार्यक्रम रहेको कारण काठमान्डौ फर्कनै पर्ने दबाबमा म थिए । नेपालगंज बिमानस्थलमा ३/ ४ जना ब्यक्तीहरु आक्रमक शैलीमा मेरा बिरुद्ध प्रस्तुत हुनुभयो । एकजनाले पारसका बिरुद्ध सातलाख हस्ताक्षर दरबारमा बुझाएर तैले हामीलाई कति दु:ख दिएको छस् ? त्यो हामीले कहाँ बिर्सेंका छौ र ? सम्म भने ।त्यो सुने पछि उनीहरुको नियत मैले बुझिहाले । सम्पूर्ण यात्रु तथा बुद्ध एयरले देखाएको समझदारीप्रति धन्यवाद ब्यक्त गर्दछु ।
मेरा कारणले यात्रुहरुमा पर्न गएको असुबिधाप्रति भने क्षमाप्राथी छु ।