काठमाडौं । नेपाल प्रज्ञा प्रतिष्ठानमा ‘राष्ट्रिय चलचित्र कन्फरेन्स’ सुरु भएको छ । ६ दशकको चलचित्रको इतिहासमा पहिलो पटक कन्फरेन्स आयोजना भएको हो ।

कार्यक्रम चलचित्र विकास बोर्ड अध्यक्ष केशव भट्टराईको प्रमुख आतिथ्यतामा सुरुवात गरिएको छ । पहिलो दिन आज हरि शर्माले ‘समाजशास्त्रीय दृष्टिमा चलचित्र’ विषयमा प्रवचन दिएका छन् ।

त्यसपछि ‘सिनेमा हेराइको शुरुवाती नेपाली अनुभव’, ‘नेपाली सिनेमामा लैङ्गिक प्रस्तुतिकरण’ र ‘नेपाली चलचित्रको राष्ट्रवादको बारेमा अनुभव’मा कार्यपत्र प्रस्तुत गरिएको थियो । अन्तिममा ‘नेपाली चलचित्रमा विविधताको खोजी’ विषयमा प्यानल छलफल गरिएको छ  ।

तीन दिन चल्ने कन्फरेन्समा चलचित्र निर्माण, विभिन्न विषयको चित्रण र प्रभावबारे कार्यपत्र प्रस्तुत, कार्यपत्रमाथि छलफल तथा चलचित्र क्षेत्रका समसामयिक विषयमा प्यानल छलफल लगायतका कार्यक्रमहरु रहने छन् ।
‘राष्ट्रिय चलचित्र कन्फरेन्स’ नेपाल पुनर्बिमा कम्पनी लिमिटेडको सहयोगमा आयोजना भएको हो । सहआयोजकका रुपमा नेपाल इन्डिपेन्डेन्ट फिल्म मेकर्स सोसाइटी, चलचित्र निर्देशक समाज, चलचित्र समीक्षक समाज, चलचित्र पत्रकार संघ, अस्कर इन्टरनेशनल कलेज आदि रहेका छन् ।

नेपालमा चलचित्र बन्न थालेको ६ दशकको इतिहासमा पहिलो पटक नेपाली चलचित्रको बारेमा गहकिलो बहस, छलफल र विमश गरिएको आयोजकको दाबी छ ।