काठमाडौं । राष्ट्रिय मानव अधिकार आयोगका अध्यक्ष अनुपराज शर्माले सशस्त्र द्धन्द्धकालीन घटनाको सत्यतथ्य बाहिर ल्याउन सरकार आफैंले नचाहेको दाबी गरेका छन् । 

आयोगका अध्यक्ष शर्माले सो घटनाको अनुसन्धानका लागि गठित सत्य निरुपण तथा मेलमिलाप आयोग र वेपत्ता छानबिन गर्न गठित आयोगका पदाधिकारी राजनीतिक दलहरुको मिलेमतोमा सिफारिस गर्नका लागि समिति गठन कामसमेत सरकारबाट भएको भन्दै असन्तुष्टि जनाए । 

बुधबार काठमाडौंमा आयोजित ‘मानव अधिकारका लागि दक्षिण एशिया’ विषयक अन्तरक्रियामा बोल्दै उनले द्धन्द्धकालीन घटनाको उत्खनन् गर्ने मानव अधिकार आयोगको प्रयासलाईसमेत सरकारले अवरुद्ध पारेको स्मरण गराए । भैरवनाथ गणमा नेपाली सेनाले हत्या गरेकाहरुको सत्यतथ्य पत्ता लगाउने काममा मानव अधिकार आयोग लागे पनि त्यसमा सरकारले भाँजो हालेको उनको दाबी छ ।

आयोगका अध्यक्ष शर्माले सरकारले संविधान र कानुनलाई समेत तजविजीमा राखेर मानवअधिकार हननका घटनालाई संरक्षण गर्ने काम गरिरहेको पनि बताए ।