काठमाडौं । नेपाल टेलिकमले पहिलो पटक सिङ्गो गाउँपालिकालाई समेट्ने गरी दू्रत गतिको इन्टरनेट सेवा ‘एफटीटीएच’ सुरु गरेको छ । सोमबार टेलिकमले रुपन्देहीको गैडहवा गाउँपालिकास्थित सूर्यपुरा बजारबाट उक्त सेवा सञ्चालनमा ल्याएको हो ।
कार्यक्रममा रुपन्देही क्षेत्र नम्बर पाँचका सांसद भरतकुमार शाहले नेपाल दूरसञ्चार प्राधिकरणका अध्यक्ष पुरुषोत्तम खनाललाई ‘एफटीटीएच’ प्रविधिको भ्वाइस तथा भिडिओ कल गरेर सो सेवाको उद्घाटन गरेका छन् ।
कार्यक्रमका प्रमुख अतिथि शाहले सेवा उपलब्ध गराएकोमा नेपाल टेलिकमलाई धन्यवाद दिँदै ग्रामीण भेगमा उच्च गतिको इन्टरनेट सेवा जडान भएकोले सबै समुदायलाई यसको उच्चतम प्रयोग गरी लाभान्वित हुन आग्रह गरे ।
नेपाल टेलिकम भैरहवा क्षेत्रीय निर्देशनालयका निर्देशक सूर्यनारायण मालाकारले नेपाल टेलिकमले अअङ्गीकार गर्नुपर्ने विभिन्न कानूनी प्रावधानका कारण भोग्नुपरेको समस्या उल्लेख गर्दै कम्पनी सदैव ग्राहक सेवामा केन्द्रित रहेको बताए ।
निर्देशक मालाकारले आगामी दिनमा नेपालका अन्य गाउँपालिकाहरुमा पनि यो सेवा विस्तार गरिने जानकारी दिए ।
कार्यक्रममा गैडहवा गाउँपालिका प्रमुख बच्चुलाल केवटले गाउँमा उच्चस्तरीय सञ्चार प्रविधि उपलब्ध नहुँदा र हुँदाको अवस्थाका बारेमा बोलेका छन् । कार्यक्रममा एफटीटीएच खरिद गर्ने ग्राहकहरुलाई राउटर हस्तान्तरण गर्दै खादा ओढाएर सम्मान गरिएको थियो ।
सोही अवसरमा त्यस भेगका जनतालाई निः शुल्क प्रिपेड सिमकार्डसमेत वितरण गरिएको टेलिकमले जानकारी दिएको छ । टेलिकमले ‘एफटीटीएच’ सेवाअन्तर्गत व्यक्तिगत र व्यावसायिक प्रयोगकर्ताका साथै कम्बो प्याकेजसमेत उपलब्ध गराएको छ ।
यसअन्तर्गत न्यूनतम एक वर्षका लागि आठ एमबीपीएसको प्याक जम्मा आठ हजार रुपैयाँमा उपलब्ध छ । हाल ‘एफटीटीएच’ प्याकेजअन्तर्गत नयाँ लाइन जडान गर्ने ग्राहकले एक थान वाइफाई राउटर (सीपीई) र १०० मिटर ड्रप फाइबर निःशुल्क प्राप्त गर्ने टेलिकमले जानकारी दिएको छ ।
