विराटनगर । नेपाली कांग्रेसका सभापति शेरबहादुर देउवाले कम्युनिष्ट पार्टीहरु नभएर अहिलेको कम्युनिष्ट सरकार भने खराब भएको आरोप लगाएका छन् । विराटनगर विमानस्थलमा मंगलबार पत्रकारहरुसँग कुराकानी गर्दै सभापति देउवाले भने, ‘‘सबै कम्युनिष्ट पार्टीहरु खराब हुँदैनन् तर अहिलेको सरकार भने बदमासीपूर्ण ढंगले चलेकोले खराब छ ।’’
देउवाले सरकार विधिविधानपूर्ण ढंगले नचलेको बरु पत्रकारलाई जेल हाल्नेसम्मको कानुन ल्याउने, मानव अधिकारको क्षेत्र तहसनहस गर्ने र व्यक्तिगत स्वतन्त्रता नै संकटमा पर्ने किसिमको कानुन ल्याउन उद्दत रहेको बताए ।
देउवाले ओली सरकार प्रजातान्त्रिक ढंगले सञ्चालन नभएको भन्दै मूल्यमान्यतालाई विचलित बनाउन खोजे कांग्रेस चुप लागेर नबस्ने चेतावनी दिए । उनले भने, ‘‘सरकारका गलत कामविरुद्ध हामी चुप लागेर बस्दैनौं ।’’ उनले सरकारलाई सच्चिन सुझाव दिए ।
देउवाले कांग्रेसभित्र एकता रहेको दाबी गर्दै यो देखाउन केन्द्रीय समितिको पूर्ण बैठकमा प्रेसलाई पनि राखिदिने बताए । ‘‘बैठकमै प्रेसलाई राखिदिन्छु । अनि देख्नुहुनेछ एकता छ कि छैन,’’ उनले भने ।
देउवाले कांग्रेस महाधिवेशन तोकिएकै समयमा हुने बताउँदै जागरण अभियान देशभर सकारात्मक ढंगले अघि बढ्ने बताए । सभापति देउवाले कांग्रेसभित्र हिन्दू राष्ट्रको विषयमा नेताले उठाउने गरेको विषयमा यसलाई रोक्न नसकिने बताउँदै भने, ‘‘धेरै साथीहरुले हिन्दू राष्ट्रको कुरा उठाउनु हुन्छ । यो भन्न पाइन्छ । कुरा उठाउन पनि पाइन्छ ।’’ सभापति देउवा जागरण अभियानअन्तर्गतको कार्यक्रमलाई सम्बोधन गर्न सुनसरीको इनरुवा आएका हुन् । उनीसँगै कार्यक्रममा कांग्रेसका केन्द्रीय नेताहरु पनि सहभागी छन् ।