प्योङयाङ । उत्तर कोरियाले अमेरिकासँगको वार्तालाई पुनः शुरु गर्न चाहेको त्यहाँका उपविदेशमन्त्रीले बताएकी छन् । उपमन्त्री चोइ सन हुइले दुवै पक्षको सहमतिमा आफूहरुले विस्तृत रुपमा छलफल गर्न चाहेको उल्लेख गरेकी छन् । उनले यही महिनाको अन्त्यसम्ममा वार्ताको इच्छा समेत देखाएकी छन् । अमेरिकी विदेशमन्त्री माइक पम्पेओले उत्तर कोरियासँग वार्ता जारी रहने आशा रहेको जनाएपछि उत्तर कोरियाली उपमन्त्रीले वक्तव्य जारी गरेर सो धारणा राखेकी हुन् ।
तर उनको भनाई आएको केही घण्टामा नै उत्तर कोरियाले छोटो दूरीका मिसाइल प्रक्षेपण गरेको जनाइएको छ । पछिल्ला दिनमा उत्तर कोरियाले यसप्रकारका मिसाइल बारम्बार प्रक्षेपण गर्दै आइरहेको छ । अमेरिकाले दक्षिण कोरियासँग संयुक्त सैन्य अभ्यासको घोषणा गरेपछि उत्तर कोरियाले असन्तोष व्यक्त गर्दै ती मिसाइल प्रक्षेपण गर्दै आएको हो । भियतनामको हनोइमा यही वर्षको फेब्रुवरी महिनामा अमेरिका र भियतनामबीच दोस्रो शिखर सम्मेलन भएको थियो ।
त्यसपछि जापानबाट दक्षिण कोरिया भ्रमणमा गएका बेलामा अमेरिकी राष्ट्रपति र कोरियाका नेता किम जङ उनबीच पनि सीमा क्षेत्रमा संक्षिप्त वार्ता भएको थियो । तर, त्यसपछि उत्तर कोरियाले लगातार मिसाइल प्रक्षेपण गर्न थालेपछि दुई देशको सम्बन्ध केही चिसो भएको थियो । (बीबीसी)
