बंगलादेशमा हजारौं रोहिंग्याली शरणार्थीहरुले र्याली निकालेका छन् । बंगलादेशमा शरण लिएको दोस्रो प्रवेशको अवसरमा उनीहरुले र्याली निकालेका हुन् । उनीहरुले म्यानमारले नागरिकता दिनुपर्ने र अन्य अधिकारहरु सुनिश्चति गर्ने सहमति भएमात्र आफू फर्किन तयार रहेको भन्दै बंगलादेशमा र्याली निकालेका हुन् ।
प्रहरी अधिकारी जाकिर हसनले एएफपीलाई दिएको जानकारीअनुसार आइतबार बंगलादेशको कोक्स बजारस्थित कुटुपालोङ क्याम्पमा निकालिएको उक्त शान्तिपूर्ण र्यालीमा करिब दुई लाख रोहिंग्याली शरणार्थीहरु सहभागी भएका थिए ।
बालबालिका, महिला र पुरुष सहभागी उक्त र्यालीमा 'इश्वर महान छन्, रोहिंग्यालाई दीर्घजीवनको कामना' लगायतका नाराहरु लगाउँदै विश्वकै सबभन्दा ठूलो शरणार्थी शिविरमा र्याली निकाल्दै दोस्रो 'नरसंहार दिवस' मनाएका हुन् ।
'नेभर अगेन' (अब कहिले पनि नहोस्) लेखिएका प्ला कार्ड, ब्यानरसहित उपस्थित रोहिंग्याले 'नरसंहार' को त्यो दिन सम्झँदै नागरिकता फिर्ता दिनुपर्ने माग गर्दै र्यालीमा सहभागी थिए । अगस्ट २५, २०१७ मा करिब सात लाख ४० हजार मुस्लिम रोहिंग्याहरु रखाइन राज्यबाट बंगलादेशतर्फ भागेका थिए । म्यानमार सेनाले रोहिंग्यामाथि दमन र अत्याचार गर्न थालेपछि राज्य छोडेर उनीहरु भागेका थिए ।
रोहिंग्या शरणार्थीलाई फिर्ता पठाउने पहलमा बंगलादेश असफल भएपछि आइतबार र्याली आयोजना गरिएको थियो । कोही पनि एकजना रोहिंगियाली शरणार्थी पनि म्यानमार फर्कन तयार थिएनन् ।
"हामी विश्वलाई भन्न चाहन्छौं कि हामीलाई हाम्रा अधिकारहरु फिर्ता चाहियो । हामीलाई हाम्रो नागरिकता, हाम्रो घर र जमिन फिर्ता चाहियो," मुहिब उल्लाह, र्यालीमा सहभागी एक रोहिंग्या शरणार्थीले एसोसियट प्रेसलाई भने, "म्यानमार हाम्रो देश हो । हामी रोहिंग्या हौं ।"
५० वर्षीया तायबा खातुनले रुँदै भनिन्, "म यहाँ दुई वर्षअघि गुमाएका मेरा दुई छोराका लागि न्याय खोज्न उपस्थित भएकी हुँ । मेरो स्वास रहुन्जेलसम्म मेरा छोराको न्यायका लागि लड्नेछु ।"
अलजजिरा