काठमाडौं । सत्तारूढ नेपाल कम्युनिस्ट पार्टी (नेकपा)का वरिष्ठ नेता माधवकुमार नेपालले पार्टी अध्यक्ष केपी ओलीसँग राजनीतिक असहमति रहेको तर व्यक्तिगत रूपमा कुनै तिक्तता नरहेको स्पष्ट पारेका छन् । बिहीबार सचिवालयको बैठकमा पार्टी अध्यक्षसँग भनाभन भएपछि वास्तविकता बुझ्न निवास पुगेका पार्टी नेता एवम् बङ्गलादेशका लागि प्रस्तावित राजदूत वंशीधर मिश्रसँग नेपालले यस्तो कुरा गरेको स्रोतले बताएको छ ।
मिश्र नेपालकै सिफारिसमा राजदूत प्रस्तावित भएका हुन् । दुई नेताबीच खटपट भएको समाचार बाहिर आएपछि मिश्र नेपाल निवास पुगेका थिए । नेता नेपालले पार्टी अध्यक्षसँग व्यक्तिगत मनमुटाव नरहेको, राजनीतिक विमतिमात्रै रहेको, निर्णयमा असहमति रहेको र त्यो पार्टीको विधि र प्रक्रियासङ्गत कुरा भएको बताएका थिए ।
“उहाँ पार्टी अध्यक्ष र प्रधानमन्त्री हो । उहाँ नै व्यक्तिगत तहमा उत्रनुभएको हो । मेरो उहाँसँग केही तिक्तता छैन । हुनुपर्ने कारण छैन,” भेटमा नेता नेपालको भनाइ उद्धृत गर्दै स्रोतले भन्यो ।
वरिष्ठ नेता नेपालले ओलीसँग सम्बन्ध सुधार्न चाहेको भनेर चर्चा चलेको भन्दै आपत्ति प्रकट गरेको स्रोतको भनाइ छ । “प्रस्तावित राजदूतसँग बैठकमा भएको कुराकानीमात्रै भएको हो । सन्देश पठाउनेगरी कुनै कुराकानी भएको छैन,” स्रोतले भन्यो । बिहीबार पार्टी अध्यक्ष ओली र नेपालबीच बैठकको निर्णय प्रक्रियाप्रति गलफति चलेको थियो । ओलीले मेरो अनुपस्थितिमा अर्का अध्यक्ष पुष्पकमल दाहाल प्रचण्डले बैठक सञ्चालन गर्न बाधा नहुने तर निर्णय प्रक्रियामा मेरो पनि सहमति चाहिने भन्दै सहमतिमा निर्णय गर्नुपर्नेमा जोड दिएका थिए ।
नेपालले भने प्रतिवाद गर्दै त्यसअघिका निर्णय सम्झाएका थिए । त्यसअघि बहुमतका आधारमा, आफ्नो असहमतिका बीच पनि निर्णय भएको उनको भनाइ थियो ।
त्यसपछि अध्यक्ष ओलीले आफू अध्यक्ष भएको तर्क पेस गरेपछि आक्रोशित नेता नेपालले ‘यू आर द सिनिअर, अमोङ्ग त इक्वेल’ अर्थात् हाम्रो सबैको हैसियत बराबरी हो भनेपछि बैठक चर्काचर्कीमा परिणत भएको थियो । नेता नेपालले यी विषय राजनीतिक भएकाले व्यक्तिगत मनमुटावमा बदल्न नहुनेतर्फ नेताहरूलाई सचेत गराएको स्रोतको दाबी छ । यही विषयलाई लिए ओलीसँग सम्बन्ध सुधार्न चाहेको भन्ने समाचारबारे नेता नेपालको खण्डन रहेको स्रोतको भनाइ छ ।