एजेन्सी । आर्सनलका डिफेन्डर डेविड लुइजले लक्ष्य प्राप्त गर्नको लागि चेल्सी छाडेर आर्सनल आएको बताएका छन् । बीबीसीसँगको कुराकानीमा डिफेन्डर लुइजले लक्ष्य पूरा गर्न आर्सनल आएको उल्लेख गरेका हुन् ।
३२ वर्षीय ब्राजिलीयन खेलाडी लुइजले शनिबार बर्नलीबिरुद्ध खेल्दै आर्सनलबाट डेब्यू गरेका थिए । उक्त खेलमा आर्सनल विजयी भएको थियो । गएको सिजनमा चेल्सीले यूरोप लिगको फाइनलमा आर्सनललाई पराजित गरेको थियो । युरोपा लिगमा आर्सनल पाँचौं स्थानमा परेको थियो ।
“मसँग लक्ष्य छ, जसकारणले गर्दा मैले चेल्सी छाडेको हुँ । मलाई नयाँ चुनौती मन पर्छ, म जीवनमा केही नयाँ गर्न चाहन्छु” लुइजले भने । नयाँ चुनौतीका लागि तयार रहेको बताएका लुइजले भने, “नयाँ चुनौतीले मलाइ प्रेरित गर्छ र म आनन्दका साथ आत्मसात् गर्छु ।”
चेल्सीका प्रशिक्षक फ्रान्क लाम्पार्डले चेल्सीमा सधैं खेल्नको लागि राख्न नसक्ने बताएपछि लुइज आर्सनलमा गएका हुन् । लुुइज आर्सनलका प्रशिक्षक इम्रीको प्रमुख खेलाडीको रुपमा हुनसक्ने आशा गरिएको छ । नयाँ सिजनमा आर्सनलले २ खेल जितिसकेको छ ।
“सबैलाई थाहा छ म चेल्सीमा निकै खुशी थिएँ, मैले चेल्सीमा निकै ट्रफी जितेको छु । लाम्पार्डलाई म सम्मान गर्छु, चेल्सीलाई लिएर लाम्पार्डको छुट्टै योजना रहेको छ । मलाई नयाँ अवसरको लागि मौका दिने चेल्सीलाई म सम्मान गर्छु । उसले अवसर दिएर मैले नयाँ चुनौतीको सामना गर्न पाएको छु,” लुुइजले भने ।