बेइजिङ । चीनको स्टेट काउन्सिलले दक्षिणी शहर सेन्जेनको हङकङ र मकाउसँग एकीकृत विकास कार्यक्रमको घोषणा गरेको छ ।  तीनवटै शहरको संस्कृति र अर्थतन्त्रलाई पनि सँगै लग्ने तयारी गरिएको जनाइएको छ । एशियन फाइनान्सियल हबको रुपमा रहेको हङकङमा सरकार विरोधी आन्दोलन चर्किदै गएपछि चीनले सो निर्देशिका जारी गरेको हो ।

स्टेट काउन्सिलको १९ बुँदे निर्देशिका सरकार नियन्त्रित मिडिया पिपुल्स डेलीमा आज प्रकाशित भएको छ । त्यसमा ‘सेन्जेनको आर्थिक बल र विकास’ भन्ने प्रसंग उल्लेख गर्दै सन् २०२५ सम्ममा त्यसलाई विश्वकै राम्रो मध्येको एक क्षेत्र बनाउने जनाइएको छ ।  चीनले गएको साता हङकङको सीमावर्ती क्षेत्र सेन्जेनमा आफ्नो सेनालाई लगेकोमा त्यसलाई विश्वले नै हङकङमा हस्तक्षेप गर्ने तयारीका रुपमा  सतर्कतापूर्वक हेरेको थियो । (रोयटर्सबाट)