काठमाडौं । नाडा अटो शो भदौ १० देखि राजधानीमा सुरु हुँदैछ । सवारी साधन किन्ने योजनामा रहेका आम नेपालीको रहर मेटाउन नाडा अटोमोबाइल्स एसोसियसन अफ नेपालले वर्षेनी यस्तो मेला आयोजना गर्दै आएकोमा यसपल्ट झनै परिस्कृत बनाउन लागेको हो । भदौ १० गतेदेखि १५ सम्म काठमाडौंको भृकुटीमण्डपमा सवारी साधनको कुम्भ मेला नाडा अटो शो हुँदैछ । यसपल्टको मेला विगतका भन्दा केही भव्य हुने नाडामा अध्यक्ष शम्भुप्रसाद दाहाले बताए ।
दाहालका अनुसार यसपटक नेपालमा बिक्री हुने सवारी तथा मोटरसाइकलका सतप्रतिशत ब्रान्ड मेलामा सहभागी हुनेछन् । मेलामा ९५ ब्रान्डका सवारी साधनसहित त्यसमा प्रयोग हुने सामग्री रहने उनले बताए । सवारी साधनबाहेक लुब्रिकेन्ट, टायर, एसेसरिज र बैंक तथा वित्तीय संस्था गरेर १ सय ६० वटा स्टल रहने उनको दाबी छ ।
यसो त दशैं तिहारको मुखैमा आयोजना हुने मेला व्यवसायीको मात्रै नभइ सबै नेपालीको उत्सव रहेको दाहालले बताए ।
मेलामा २३ वटा ब्रान्डका चारपांग्रे सवारीसाधन, १९ वटा ब्रान्डका दुई पांग्रे सवारीसाधन, नौ वटा ब्रान्डका टायर, पाँचवटा ब्रान्डका ब्याट्री, १४ वटा ब्रान्डका पार्टपुर्जा र १३ वटा वित्तीय संस्थाहरुको स्टल राखिनेछ । मेला संयोजक निराकार श्रेष्ठले पनि सर्वसाधारणलाई सहज अवलोकनका लागि व्यवस्थापन चुस्त बनाइएको दाबी गरे । उनले भने, “सर्वसाधारणका लागि सहज अवलोकन गर्ने वातावरण बनाउन पार्किङदेखि मेलास्थलसम्मको व्यवस्थापनमा धेरै ध्यान दिइएका छौं ।”
यसपटकको नाडा अटो शोमा बगैंचा पनि प्रयोग गरिएको छ । भव्य बनाउन बगैंचामा फुड स्टल र अटो कम्पोनेन्टको स्टल राखिने भएको छ । मेला आकर्षक बनाउन पहिलोपटक ओभरहेड ब्रिज पनि बनाउन लागिएको छ । यसबाट आवागमन सहज हुनेछ । पार्किङ स्थल सीमित भए पनि आयोजकले सकेसम्म सुविधा दिने दाबी गरेको छ । छ दिनसम्म चल्ने मेलामा ७५ हजार जना अवलोकनकर्ताले मेला अवलोकन गर्ने आयोजकले जनाएको छ ।
यसपल्टको मेला यसकारण पनि विशिष्ट हुनेछ कि मेलामा जैविक इन्धनबाट चल्नेदेखि विद्युतीय र हाइब्रिड गाडी पनि प्रमुख आकर्षणका रुपमा रहनेछन् । सरकारले हाइब्रिड गाडीमा करमा छुट दिएको छ । केही कम्पनीले यसैबीचमा मेलाकै लागि भनेर त्यस्ता गाडी राख्ने जनाइसकेको छ ।
कुन ब्रान्डको कस्तो योजना ?
नेपाली बजारमा राम्रै व्यवसाय गरिरहेका केही कम्पनीले तीनैखाले सवारी ल्याउने भएका छन् । तीमध्ये सुजुकीका चारपांग्रे सवारीको नेपालका लागि आधिकारिक वितरक सीजी मोटोकर्पले नेपालमा पहिलोपल्ट माइल्ड हाइब्रिड कार नाडामा प्रदर्शनीमा राख्ने जनाएको छ । माइलेज साधारणभन्दा २० प्रतिशत बढी रहने यस्तो गाडी वातावरण मैत्री हुने तथा मूल्य पनि केही कम हुने दाबी गरिएको छ ।
विद्युतीय सवारीको लागि पूर्वाधार तयार नभइसकेको अवस्थामा यो सवारीले बजारमा राम्रो गर्ने कम्पनीले जनाएको छ । गाडी विद्युतीय सवारीभन्दा सस्तो पर्छ । सुजुकीले नाडा अटो शोमा एस क्रस, सियाज र एर्टिगा मोडलको कार नाडामा राख्ने भएको हो । निसानले किक्सलाई नै नाडामा शोकेस गर्ने भएको छ । किक्सको अपर भेरियन्ट नाडामा प्रमुख आकर्षणको रुपमा रहने छ । डाट्सनले गोको टप भेरियन्ट नाडामा शोकेश गर्ने जनाएको छ ।
फोर्डले शोकेश गर्ने सवारीहरु रेन्जरको एक्सएलटी अटोमेटिक, थन्डर इकोस्पोर्ट प्रमुख आकर्षण रहनेछ । यसबाहेक फिगोको नयाँ मोडल तथा अरु सवारी पनि राखिने फोर्डले जनाएको छ । टोयोटाले हालसम्म र्याभ फोरलाई नाडामा राख्ने जनाएको छ । महिन्द्राले एक्सयूभी ३०० फेरि लन्च गर्दैछ । यो सवारी महिन्द्रा उदयमा शोकेस गरिएको थियो भने नाडामा यसको बुकिङ तथा बिक्री गरिने छ ।
कियाका स्पोर्टेज, नयाँ ईभी निरो मुख्य आकर्षणका रुपमा रहनेछ । जिप कम्पासको नयाँ भेरियन्ट ट्रेल हक पनि नाडामा देख्न सकिनेछ । दुईपांग्रेतर्फ रोयल एनफिल्डले भर्खरै लन्च गरेको गनमेटल ग्रे ३५० शोकस गर्नेछ । पियाजोका स्टोर्म १२५ हाइलाइटका रुपमा रहनेछ । एप्रिलिया डिजिटल १५० सीसी पनि नाडामा किन्न पाइनेछ ।
हिरोले नाडालाई लक्षित गरेर एक्सपल्स २०० टी ल्याउने जनाएको छ । यामाहाले नयाँ मोटरसाइकल एमटी १५ तथा स्कुटर एनम्याक्स १५५ मुख्य आकर्षण हुनेछ । राख्नेछ । टीभीएसले आरआर ३१० मोटरसाइकल, एनटर्क स्कुटर, जुपिटर क्लासिक स्कुटर तथा आरटीआर १५० र आरटीआर २०० नाडामा राख्ने जनाएको छ ।