भारतीय जनता पार्टी (बिजेपी) का सांसद हन्स राज हन्सले जवाहरलाल नेहरु विश्वविद्यालयको नाम परिवर्तन गरेर प्रधानमन्त्री नरेन्द्र मोदीको नाम राख्नुपर्ने बताएका छन् । विश्वविद्यालयमा आयोजित एक कार्यक्रममा भाग लिएका बिजेपीका उत्तरपश्चिम दिल्लीका सांसद हन्सले काश्मीर मामिलाका विषयमा बोल्दै नेहरु-गान्धी परिवारप्रति व्यंग्य गरेका हुन् । उनले भने, " 'एक साम, सय दिनमा नाम' । हामी हाम्रा पुर्खाले गरेको गल्तीको सजाय भोगिरहेका छौं ।"

"भगवानको कृपाले हामी शान्तिपूर्ण रुपमा बिना कुनै बमबारीका साथ बस्न पाएका छौं । म भन्न चाहन्छु कि हामीले जेएनयू (जवाहरलाल नेहरु युनिभर्सिटी) को नाम परिवर्तन गरी प्रधानमन्त्री नरेन्द्र मोदीको नामबाट राख्नुपर्छ । मोदीजीको नामबाट पनि केही राखिनुपर्छ," उनले थपे । 

कार्यक्रम समापनपछि मिडियासँग कुरा गर्दै बिजेपी सांसद हन्सराजले जवाहरलाल नेहरुले विगतमा गल्ती गरेको बताए । उनले थपे, "म पहिलोपटक जेएनयू आए पनि जेएनयूका विषयमा थुप्रै कुरा थाहा छ । तर, अब मोदी सरकारले गरेको योगदानका आधारमा विश्वविद्यालयको नाम परिवर्तन गरिनुपर्छ । प्रधानमन्त्री मोदीले राष्ट्रका लागि थुप्रै काम गर्नुभएको छ । त्यसकारण जवाहरलाल नेहरु विश्वविद्यालयको नाम परिवर्तन गरेर मोदी नरेन्द्र विश्वविद्यालय राख्नुपर्छ ।"   

त्यसैगरी विश्वविद्यालयका बिजेपीका विद्यार्थी नेता मनोज तिवारीले पनि हन्सराजको कुरामा समर्थन जनाएका थिए । 

हिन्दूस्तान टाइम्स