पटना । हत्या तथा हत्या प्रयासमा कैयौं अभियोग लागेका विहारका स्वतन्त्र विधायक अनन्त सिंहलाई गएराति पक्रनको लागि प्रहरी घरमा पुग्दा पछाडिको ढोकाबाट भागेर उनी फरार भएका छन् ।   उनी भागेपनि प्रहरीले छोटन नामको अर्को अभियुक्तलाई भने पक्राउ गरेको छ । छोटनमाथि पनि २२ वटा हत्याका अभियोग रहेको बताइएको छ । विधायकलाई पक्रिन सिटी एसपी विनय तिवारीको नेतृत्वको टोली पुगेको थियो । 

यसअघि प्रहरीले विधायक सिंहको घरमा छापा मारेर एके ४७ राइफल बरामद गरेको थियो ।  प्रहरीले विधायकको घरबाट बम पनि बरामद गरेको छ । उनीमाथि पहिलादेखि नै दर्जनौं हत्या र हत्या प्रयासका मुद्धा दर्ता रहेका छन् । विधायक सिंहले आफ्ना सहयोगीसँग मिलेर कसैको हत्याको षडयन्त्र गरिरहेको अडियो क्लिप हालै सार्वजनिक भएपछि प्रहरीले उनलाई खोजी गरिरहेको थियो ।  सो अडियो भाइरल भएपछि गएको साता प्रहरीले उनको भ्वाइस स्याम्पलको परीक्षण समेत गरेको थियो । (एजेन्सी)