काठमाडौं । प्रधानमन्त्री केपी शर्मा ओलीको स्वास्थ्यमा गडबडी भएपछि रोकिएको नेपाल कम्युनिस्ट पार्टी (नेकपा) को सचिवालय बैठक आज बस्दैछ । बिहान ११ बजेका लागि बोलाइएको बैठकमा यसअघि थाँती रहेका कार्यसूचीमा छलफल हुने सचिवालयका नेताहरूले जानकारी दिएका छन् ।
नेकपामा विभाग र केन्द्रीय सदस्यहरूको कार्यविभाजन बाँकी छ । ३२ वटा विभागमध्ये स्कुल विभाग पेचिलो बनेको छ । ३२ विभागमध्ये १८ वटा पूर्वएमाले र १४ वटा पूर्वमाओवादी केन्द्रले लिने सैद्धान्तिक समझदारी भए पनि विभाग प्रमुख टुंगो लागेको छैन ।
संगठन विभाग प्रमुख वामदेव गौतम र विदेश विभागमा माधवकुमार नेपाल प्रस्तावित भए पनि बाँकी विभाग प्रमुख विषयले सचिवालयमा प्रवेश पाएको छैन । सचिवालय सदस्य ईश्वर पोखेरलले आ–आफ्ना साविक पार्टीमा छलफल भए पनि स्कुललगायत अन्य विभागबारे सचिवालयमा छलफल नै नभएको बताए ।
पूर्वएमालेबाट स्कुल विभागमा ईश्वर आकांक्षी छन् । पूर्वमाओवादी केन्द्रबाट भने नारायणकाजी श्रेष्ठको नाम अघि सारिएको छ ।
आकांक्षी बढ्दै गएर एकता प्रक्रिया नै अवरुद्ध भएपछि पार्टी स्कुल विभाग पार्टी अध्यक्षद्वय केपी शर्मा ओली र पुष्पकमल दाहाल आफैँले राख्ने गरी बाँकी विभाग टुंगो लगाउन लागिएको स्रोतको दाबी छ ।
आज बस्न लागेको सचिवालयको बैठकले विभागलाई पूर्णता दिने तयारी गरेको बालुवाटार स्रोतले जानकारी दियो ।
