काठमाडौं । खानेपानी मन्त्रालयले मेलम्ची आयोजनाको काम छाडेर हिँडेको ठेकेदार कम्पनी सीएमसीबाट स्थानीयले ठेकेदारले पाउने रकम भुक्तानीका लागि समिति गठन गरेको छ ।

०७१ सालदेखि आयोजनामा काम गर्दै आएका स्थानीय ठेकेदार कम्पनी र निर्माण सामग्री सप्लायर्सहरुले सीएमसीले आफूहरुलाई करिब डेढ अर्ब रुपैयाँ भुक्तानी गर्न बाँकी रहेको दाबी गरेका छन् ।

०७५ पुस ३ गते उक्त कम्पनीले मेलम्ची आयोजनाको काम छोडेको थियो । बुधबार मन्त्रालयलमा छलफल गर्दै मन्त्री बिना मगरको उपस्थितिमा सहसचिव चन्द्रबहादुर केसीको संयोजकत्वमा गठन भएको समितिले स्थानीय ठेकेदार र व्यवसायीले दाबी गरेको बाँकी भुक्तानीबारे अध्ययन गरी प्रतिवेदन पेस गर्ने छ ।

सीएमसीले आयोजनाको काम छोडेर हिँडेपछि हेडवक्र्स निर्माण र सुरुङ फिनिसिङको काम बाँकी रहेको छ । यो काम पूरा गर्नका लागि मेलम्ची खानेपानी विकास समितिले दुई महिनाअघि आह्वान गरेको बोलपत्रमा चीनको सिनो हाइड्रो कम्पनी छनोट भएको छ ।

कम्पनीसँग ठेक्का सम्झौता गर्न बाँकी रहेको समितिले बताएको छ । “कम्पनीले अब चाँडै नै काम सुरु गर्ने छ,” समितिका प्रवक्ता राजेन्द्र पन्तले भने, “सोही कम्पनीले हेर्डवक्र्स र सुरुङ फिनिसिङको दुईवटा प्रोजेक्ट बनाएर काम गर्ने छ ।”

आयोजनाका प्रमुख सूर्यराज कँडेलले हेडवर्क्स र सुरुङ फिनिसिङजस्ता ठूला प्याकेजका कामको ठेक्का सम्झौता गर्ने तयारी अन्तिम चरणमा रहेको बताए ।
“अहिले नदी संरक्षण र सुरुङभित्र भेन्टिलेसन सफ्टको काम भइरहेको छ,” कँडेलले भने ।

मन्त्रीले फेरि दिइन् निर्देशन 

यही बुधबार खानेपानी मन्त्री बिना मगरले प्रतिनिधिसभा बैठकमा बोल्दै आफ्नै कार्यकालमा मेलम्चीको खानेपानी काठमाडौं आइपुग्ने बताएकी थिइन् । एक हप्तापछि बुधबार मन्त्रालयमा छलफल राख्दै मन्त्री मगरले आयोजनाको बाँकी कामलाई द्रुत गतिमा अघि बढाउन निर्देशन दिइन् । 

मन्त्री मगरको उपस्थितिमा बुधबार सिंहदरबारमा सम्पन्न भएको बैठकले मेलम्ची खानेपानी विकास समितिका कार्यकारी निर्देशक सूर्यराज कँडेलसहितको टीमलाई आयोजनास्थलमै खटेर मेलम्ची आयोजनाको काम अघि बढाउन निर्देशन दिएकी हुन् ।

आयोजनाका प्रमुख, समितिका अन्य पदाधिकारी र डिभिजनल इन्जिनियरहरु सहितको टोलीलाई आयोजनास्थलमा खट्न र आयोजनामा देखिएको अन्यौल हटाउँदै अघि बढ्न मन्त्रीबाट निर्देशन आएको मन्त्रालयका प्रवक्ता रितेशकुमार शाक्यले जानकारी दिए ।