हङकङ । हङकङकी प्रमुख प्रशासक तथा नेतृ केरी लेमले हङकङलाई गहिरो अन्तहीन खाडलमा नपुर्याउन सरकार विरोधी प्रदर्शनकारीलाई आग्रह गरेकी छन् । मंगलबार आयोजित पत्रकार सम्मेलनमा उनले सो चेतावनी दिएकी हुन् । उनले हङकङ खतरनाक अवस्थामा पुगेको जनाउँदै हिंसाले फर्कनै नसक्ने बाटोमा पुर्याउने चेतावनी समेत दिइन् ।
गएका दश हप्तादेखि हङकङमा आन्दोलन चर्किरहेको छ । यो आन्दोलनको शुरुवात सरकारबाट प्रस्तावित सुपुर्दगी सम्बन्धी विधेयकका कारणले भएको थियो । सो विधेयकमा हङकङबाट चीनलाई सुपुर्दगी गर्ने सम्बन्धी व्यवस्था थियो ।
आन्दोलनपछि सरकारले विधेयक फिर्ता गरेकोमा शुरुमा त्यसलाई रद्द गर्नुपर्ने माग अघि सार्नुका साथै हङकङकी प्रमुख प्रशासक तथा नेतृ लेमको राजीनामा समेत प्रदर्शनकारीहरुले मागेका थिए । अहिले पक्राउ गरिएकाहरुलाई रिहा र अन्य माग पनि थपिएका छन् ।
उनीहरुको प्रदर्शनलाई चिनियाँ अधिकारीहरुले भने आतंकवाद भन्न थालेका छन् । गएको आइतबार प्रहरीमाथि पेट्रोल बम प्रहार भएपछि चीनले सो टिप्पणी गर्न थालेको हो । प्रहरीले पनि भेष बदलेर प्रदर्शनकारीको निगरानी गरिरहेको सञ्चार माध्यममा समाचार आएका छन् ।
प्रदर्शन बढ्दै गएमा चीनले अहिले दिइरहेको स्वतन्त्रता समेत छिनिन सक्ने एकथरीले टिप्पणी गरिरहेका छन् । हङकङ चीनको विशेष प्रशासकीय क्षेत्र हो । नेतृ लेम मंगलबार आँखाभरी आँसु पारेर पत्रकार सम्मेलनमा प्रस्तुत भएकी थिइन् । उनले पत्रकार सम्मेलनमा भनेकी थिइन्, “सोच्नका लागि एक मिनेट छुट्याउनुस् । हाम्रो शहरलाई हेर्नुस् । के यसलाई खाडलमा पार्न तपाईहरु चाहनुहुन्छ ?”
यस्तै अवस्था रहेमा हङकङ अन्तहीन खाडलमा पर्ने उनको भनाई थियो । उनले प्रहरीले चालेको कदमको भने प्रतिरक्षा गरेकी थिइन् । उनले प्रहरीले गर्ने काम आफूले चाहेको जस्तो पनि नहुने भन्दै उनीहरुले घटनास्थलको परिस्थिति अनुसार निर्णय गर्नुपर्ने अवस्था रहेको बताइन् ।
प्रहरीमाथि प्रदर्शनकारीलाई ज्यादती गरेको भन्ने आरोप लाग्दै आएको बेलामा उनले प्रतिरक्षा गरेकी हुन् । उनले आफ्नो काम हङकङलाई सुरक्षित र आवश्यक नीति नियम बमोजिम चलेको शहर बनाउनु भएको जनाइन् ।
सरकारविरोधी प्रदर्शन गएको जुन महिनामा शुरु भएको हो । हङकङ चीन मातहतमा रहेपनि चीनको मुख्य भूभागमा भन्दा यहाँ जनतालाई स्वतन्त्रता छ । प्रेस र अदालत स्वतन्त्र छन् । एक देश, दुई प्रणालीको रुपमा अन्तर्राष्ट्रिय जगतले चीन र हङकङको मामिलालाई बुझ्दै आएको छ ।
(बीबीसी)
