काठमाडौं । नेपाल कम्युनिस्ट पार्टी (नेकपा) ले नेकपा (मसाल) नेकपा (क्रान्तिकारी माओवादी), नेमकिपा र अन्य कम्युनिस्ट घटकलाई जडसूत्रीय चित्रण गरेको छ । भर्खर प्रकाशनमा गएको नेकपाको राजनीतिक दस्तावेजमा ती शक्ति एवम् कम्युनिस्ट घटकहरूलाई सङ्कीर्ण, आत्मकेन्द्रित चिन्तकका रूपमा परिभाषित गरिएको हो ।

त्यस्तै, प्रतिबन्धित पार्टी नेत्रविक्रम चन्द ‘विप्लव’ समूहलाई नेकपाले ऐतिहासिक परिवर्तनलाई कमजोर पार्ने र यसलाई उल्ट्याउन तथा नेपालमा अस्थिरता उत्पन्न गर्न चाहने शक्तिका रूपमा अर्थ्याएको हो । नेकपा (मसाल), नेकपा (क्रान्तिकारी माओवादी), नेमकिपा र अन्य कम्युनिस्ट तथा वामपन्थी समूहहरू पनि राजनीतिमा क्रियाशील छन् । उनीहरूका जडसूत्रीय, सङ्कीर्ण, आत्मकेन्द्रित चिन्तन, नीति र व्यवहारको आलोचना गर्दै उनीहरूलाई एकतामा सामेल गर्ने पहल र प्रयत्न अघि बढाउनुपर्छ । उनीहरूसँग राष्ट्रियता, लोकतन्त्र, समृद्धि र समाजवादका विषयमा कार्यगत एकता र सहकार्यको नीति लिइनेछ । तर, उनीहरूका गलत नीति र व्यवहारका विरुद्ध सैद्धान्तिक र वैचारिक सङ्घर्ष गर्ने हाम्रो नीति स्पष्ट छ,” नेकपाले भनेको छ ।

“नेत्रविक्रम चन्द समूहले उग्रवामपन्थी प्रवृत्तिको प्रतिनिधित्व गरिरहेको छ । नेपाली जनताको बलिदान र संघर्षबाट प्राप्त परिवर्तन र त्यसलाई संस्थागत गर्ने संविधानलाई अस्वीकार गर्दै पुनः सशस्त्र संघर्षलाई तत्कालीन राजनीतिक प्रतिवेदन दृढ कार्यसूची बनाउने वकालत गरिरहेको छ । यो नेपालको आजको आवश्यकता र परिस्थितिसँग पटक्कै मेल नखाने काम हो । यसले ऐतिहासिक परिवर्तनलाई कमजोर पार्ने र यसलाई उल्ट्याउन तथा नेपालमा अस्थिरता उत्पन्न गर्न चाहने विभिन्न शक्ति तथा प्रवृत्तिलाई बल पुर्याउने कार्य गर्दछ । यसको मनोगतवादी एवम् उग्रवामपन्थी प्रवृत्तिको कडा आलोचना गर्दै यसलाई राजनीतिको मूलधारमा ल्याउने प्रयत्न गर्नुपर्दछ,” नेकपाको निष्कर्ष छ ।

राप्रपालाई भने नेकपाले सामन्तवादी अवशेषको प्रतिनिधि संस्था भनेको छ । राप्रपाले धर्मलाई राजनीतिको अस्त्र बनाउन खोजेको पनि आरोप लगाएको छ । “पूर्वपञ्चहरूको पार्टी राप्रपा अहिले तीन समूहमा विभाजित छ । यी तीनवटै समूहले मूलतः सामन्तवादी अवशेषको प्रतिनिधित्व गर्दछन् । यिनीहरूले हिन्दू राज्यको नाममा धर्मलाई राजनीतिको अस्त्र बनाउन खोजिरहेका छन् । पछिल्लो निर्वाचनबाट राप्रपाका सबै समूहहरू जनताबाट पूरै अस्वीकृत भएका छन्,” उसले भनेको छ ।

यस्तै नेकपाले विवेकशील साझा, साझालगायत वैकल्पिक पार्टीहरूलाई पार्टीको दर्जा दिन आवश्यक ठानेको छैन । उनीहरूका बारेमा दस्तावेज पूरै मौन छ ।