काठमाडौं । प्रमुख प्रतिपक्षी दल नेपाली कांग्रेस र अर्को प्रतिपक्षी दल राष्ट्रिय जनता पार्टी (राजपा) ले संयुक्त रूपमा प्रतिनिधिसभामा जरुरी सार्वजनिक महत्वको प्रस्तुत गरेका छन् ।
प्रतिपक्षी दलले देशभर गएको बाढीपहिरो तथा डुबानसम्बन्धी जरुरी सार्वजनिक महत्वको प्रस्ताव पेश गरेका हुन् । बाढीपहिरो, डुबानलगायत प्राकृतिक विपद्को बारेमा सदनमा छलफल होस् र विपद् व्यवस्थापन प्रभावकारी बनोस् तथा सरकारको ध्यान जाओस् भनेर जरुरी सार्वजनिक महत्वको प्रस्ताव लगेको कांग्रेसले बताएको छ । बैठकमा कांग्रेस सांसद मीनेन्द्र रिजालले प्रस्ताव पेश गरेका छन् ।
यसअघि असार ३० गतेका लागि बोलाइएको बैठक बस्दै नबसी साउन आठ गतेका लागि सारिएको थियो । बाढीपहिरो तथा डुबानका कारण सांसदहरु आफ्नो क्षेत्रमा जानुपर्ने भएकाले बैठक स्थगित गरिएको सूचना जारी भएको थियो । तर, कांग्रेसले भने विरोध हुने डरले सरकारले संसद् बैठक स्थगित गराएको आरोप लगाउँदै आपत्ति जनाएको थियो ।