काठमाडौं । नेपाली कांग्रेसको भ्रातृ संगठन नेपाल विद्यार्थी संघ (नेविसंघ) ले निवर्तमान महामन्त्री आनन्दराज त्रिपाठीको संयोजकत्वमा बाढीपहिरो पीडितहरुका लागि राहत संकलन समिति गठन गरेको छ ।
मंगलबार कमलादीमा बसेको विद्यार्थी नेताहरुको भेलाले पूर्वमहामन्त्री त्रिपाठीको संयोजकत्वमा बाढीपहिरो पीडितहरुका लागि राहत संकलन गर्ने निर्णय गरेको हो । भेलाले कांग्रेसकै भ्रातृ संगठन नेपाल सांस्कृतिक संघका महासचिव शिवशंकर रिजाललाई राहत संकलन समितिको सहसंयोजक चुनेको छ ।
विद्यार्थीहरुको भेलाले नेविसंघका निवर्तमान उपाध्यक्षद्वय नवीन राई र कृष्णकुमारी बस्नेत तथा निवर्तमान महामन्त्री त्रिपाठीको नाममा राहत रकÞम संकलनका लागि संयुक्त बैंक खाता सञ्चालन गर्ने निर्णय गरेको पूर्वउपाध्यक्ष ऋषिकेशजंग शाहले जानकारी दिए ।
उनका अनुसार भेलामै नगद तथा प्रतिबद्धता गरी ६६ हजार १० रुपैयाँ बाढीपीडितहरुका लागि सहयोग रकम जम्मा भएको छ । यसअघि विद्यार्थी नेताहरुले बाढीपीडितहरुका लागि राहत रकम संकलन गर्न बनाइएको योजनाका बारेमा सभापति शेरबहादुर देउवालाई जानकारी गराएका थिए ।