लण्डन । बेलायतमा आज बोरिस जोहन्सन वा जेरेमी हन्ट मध्ये एक जना प्रधानमन्त्रीको लागि चयन हुने भएका छन् । मंगलबार मध्यान्हसम्म को प्रधानमन्त्री हुने भन्ने कुराको छिनोफानो भइसक्ने छ । कन्जरभेटिभ पार्टीका कार्यकर्ताले मतदानमार्फत आफ्नो नेता छानेपछि भावी प्रधानमन्त्री चयन हुनेछन् । औपचारिक रुपमा प्रधानमन्त्रीको घोषणा भने भोलि बुधबार हुनेछ ।
जोहन्सन लण्डनका पूर्वमेयर हुन् । उनले जितेमा केही वरिष्ठ नेताले उनी मातहतको सरकारमा सामेल नहुने जनाएका छन् । अर्का प्रतिस्पर्धी हन्ट भने बहालवाला विदेशमन्त्री हुन् । भोलि प्रधानमन्त्री मे ले औपचारिक रुपमा महारानी समक्ष राजीनामा दिएर बिदा हुनेछन् । त्यसपछि नयाँ प्रधानमन्त्रीले कार्यभार सम्हाल्नेछन् । (बीबीसी)