वाशिङटन । नर्थ क्यारोलिना राज्यमा ट्रम्पको एक चुनावी र्यालीमा उनका समर्थकले एक विपक्षी महिला सांसदविरुद्ध ‘सेन्ड हर ब्याक’को नारा लगाए । सो समयमा ट्रम्प सांसद इलहान ओमरको विरोध गरिरहेका थिए ।
ओमार सोमालिया मूलकी अमेरिकी नागरिक हुन् । यसका कारण विवाद उत्पन्न उत्पन्न भएको छ । कैयौं सांसदले पनि कुरा उठाएका छन् । ह्वाइट हाउसमा ट्रम्पले पत्रकारको जिज्ञासामा आफ्ना समर्थकले लगाएको नाराबाट आफूलाई केही पछि हटाएको संकेत गरेका छन् ।
ट्रम्पले भने, ‘‘म यसमा खुसी थिइनँ । तर मैले उनीहरुले गरेको काममा म खुसी छैन चाहिँ भनिन । ’’ उनी के कुरामा सहमत थिएनन् भन्ने बारेमा चाहिँ प्रष्ट बताएनन् । सांसद ओमारले र्यालीमा जे भनियो त्यो फासीवादी विचार भएको बताइन् ।
उनको भनाई थियो,‘‘राष्ट्रपतिले जे कुरा भने त्यसलाई हृदयमा लिनुको अर्थ छैन । हामी त्यस्तै अमेरिकाबासी हौं जस्तो अरु छन् । यो हाम्रो देश हो र हामी यहींका मानिस हौं । ट्रम्प मञ्चबाट आफ्नो फासीवादी सोच फैलाइरहेका छन् । अमेरिकी नागरिकलाई बाहिर जान भनिरहेका छन् । यसको मतलब यति हो कि उनको नकारात्मक नीतिको हामीले समर्थन गरेका छैनौ । हामी यो भन्न चाहन्छौं कि अमेरिकामा असहमत हुनु नै देशभक्ति हो । ’’
सेन्ड हर ब्याकको नाराले सन् २०१६को चुनावी झल्को दिएको थियो । उनकी प्रतिस्पर्धी हिलारी क्लिन्टनलाई जेल पठाउनका लागि भन्दै त्यतिबेला ट्रम्प समर्थकले ‘लक हर अप’ नारा लगाएका थिए । गएको आइतबार ट्रम्पले ट्विट गर्दै चार जना विपक्षी सांसदलाई संकेत गरेर अमेरिका मन पर्दैन भने फर्केर जान आग्रह गरेका थिए ।