नयाँ दिल्ली । राहुल गान्धीले पार्टी अध्यक्षबाट राजीनामा दिएपछि भारतीय कांग्रेस पार्टी नयाँ अध्यक्ष चयनको सकसमा छ । सहमतिमा अध्यक्ष चयनका लागि पार्टीले ‘सीनियर’ र युवा नेताहरुबीच छलफल गरे पनि सहमति जुट्न सकेको छैन ।
सहमतिमा अध्यक्ष चयन गर्न नसकेका कारण कांग्रेसले चाँडै वर्किङ कमिटीको बैठक बोलाएर अध्यक्षका लागि चुनाव गर्न सक्ने बताइएको छ । कांग्रेसको अध्यक्ष पदका लागि हुन गइरहेको चुनावमा यस पटक गान्धी परिवार चुनावी दौडमा हुने छैन । जसका कारण पार्टीमा भागबण्डा हुन सक्ने स्रोतलाई उद्धृत गर्दै भारतीय सञ्चार माध्यमहरुले जनाएका छन् ।
स्रोतका अनुसार कांग्रेसमा अध्यक्ष पदका लागि सात जना नेताहरुले दाबेदारी प्रस्तुत गरिरहेका छन् । जसमा सुशील कुमार शिन्दे, मलिकार्जुन खडगे, मुकुल वासनिक, कुमारी शैलजा र मीरा कुमार दलित समुदायबाट प्रतिनिधित्व गर्दछन् । त्यस्तै ज्योतिरादित्य सीन्धिया र सचिन पायलट पार्टीका युवा र ओबीसी अनुहार हुन् ।
राहुल गान्धीले पदबाट राजीनामा दिएपछि कांग्रेसका सीनियर नेताहरुको टोलीले सोनिया गान्धीसँग गान्धी परिवारबाट कसैलाई पार्टीको जिम्मेबारी दिन आग्रह गरेको थियो । तर, सोनिया गान्धीले नेताहरुको प्रस्ताव अस्वीकार गरेकी थिइन् ।
कांग्रेस वर्किङ कमिटीले अध्यक्ष पदको चुनाव घोषणा गरे पनि हरियाणा, झारखण्ड र महाराष्ट्रमा विधानसभा चुनाव सम्पन्न भएपछि मात्रै कांग्रेसले अध्यक्ष पाउने सम्भावना देखिएको छ । यसअघि १९९० मा राजेश पायलटले सीताराम केसरीविरुद्ध र २००० मा जितेन्द्र प्रसादले सोनिया गान्धीविरुद्ध चुनाव लडेका थिए ।
पार्टीभित्र प्रियंका गान्धीलाई अध्यक्ष बनाउन माग
पार्टी अध्यक्षबाट राहुल गान्धीले राजीनामा दिएपछि कांग्रेसमा प्रियंका गान्धी वाड्रालाई अध्यक्ष बनाउनुपर्ने माग उठिरहेको छ । पूर्व राष्ट्रपति प्रणब मुखर्जीका छोरा तथा पूर्व सांसद अभिजीत मुखर्जी प्रियंका गान्धी वाड्राको पक्षमा खुलेरै ‘लबिङ’ गरिरहेका छन् । उनले पार्टीको नेतृत्व सम्हाल्न देशभरका कांग्रेस कार्यकर्ताहरुको मागलाई नजरअन्दाज गर्न नहुने बताएका छन् । पूर्व केन्द्रीय मन्त्री तथा वरिष्ठ कांग्रेस नेता अनिल शास्त्रीले पनि वर्तमान परिस्थितिमा पार्टीको अगुवाई गर्नका लागि प्रियंका गान्धी उचित अनुहार भएको बताएका छन् ।
एबीपी न्यूज