काठमाडौं । नेपाली कांग्रेसका युवा नेता एवम् पूर्वसांसद रामहरि खतिवडाले अरिंगालले टोकेर गम्भीर घाइते भएका गनबहादुर श्रेष्ठलाई हेलिकप्टरबाट उद्धार गरेका छन् । खतिवडाले मंगलबार काठमाडौंबाट ओखलढुंगा हेलिकप्टर पठाएर ५२ वर्षीय श्रेष्ठलाई उपचारका लागि त्रिभुवन शिक्षण अस्पताल महाराजगञ्जको आकस्मिक उपचार कक्षमा भर्ना गरेका छन् ।

त्रिवि शिक्षण अस्पतालको आकस्मिक उपचार कक्षका चिकित्सक डा. अर्जुन बानियाँले श्रेष्ठको उपचार सुरू भइसकेको जानकारी दिए । "उहाँलाई अरिंगालले शरीरका विभिन्न भागमा टोकेको रहेछ", उनले भने, "श्रेष्ठको स्वास्थ्य परीक्षणदेखि अन्य सबै उपचार सुरू गरेका छौँ । रिपोर्टमा के देखाउँछ । सोही अनुसारको उपचार हुनेछ ।"

घाइते श्रेष्ठको घर ओखलढुंगा जिल्लाको मानेभञ्ज्याङ गाउँपालिकाको वडा नम्बर ९ फलहरिमा पर्छ । श्रेष्ठलाई सदरमुकामको मिशन अस्पतालमा उपचारका लागि भर्ना गरिएको थियो । चार दिन अगाडि अरिंगालले टोकेर घाइते भएका श्रेष्ठलाई मिशन अस्पतालले थप उपचारका लागि काठमाडौं लैजान आग्रह गरेको थियो ।

विगत चार दिनदेखि परेको अविरल वर्षाका कारण ओखलढुंगाबाट अन्य जिल्ला जोड्ने सडकहरू अबरुद्ध भएपछि श्रेष्ठलाई काठमाडौं ल्याउन सकिएको थिएन । श्रेष्ठको बारेमा जानकारी पाएपछि नेता खतिवडाले काठमाडौंबाट ओखलढुंगा हेलिकप्टर पठाएका थिए ।