काठमाडौं । विसं २०७२ सालमा गएको महाभूकम्पमा चिरा परेपछि जोडिन नसकेको दशरथ रंगशालाको पुनर्निमाणको कार्य भइरहेको छ । भूकम्पपछि कुरुप भएको रंगशाको पुनर्निमाण कार्यसँगै रंग फेर्दैछ । नेपालमा रहेको एकमात्र अन्तर्राष्ट्रियस्तरको रंगशाला नबन्दा फुटबल प्रेमी तथा खेलाडी ठूलो समस्यामा परेका छन् । 

रंगशाला नबन्दा १३ औँ दक्षिण एसियाली खेलकुद सागको मिति पटक-पटक सरेको थियो । अहिले भने राष्ट्रिय खेलकुद परिषद्ले रंगशाला निर्माणको कार्य अन्तिम चरणमा पुगेको बताएको छ ।

नेपाली फुटबलको ‘होम’ खेलाडीकै लागि बिरानो बनिसकेको अवस्थामा रंगशालाको रुप रंगिन बन्दै गएसँगै केही आशा पलाएको छ । विषेशगरी सागलाई लक्षित गर्दै बन्न लागेको रंगशाला दृश्य अहिले हेर्न लायक छ ।

रंगशाला समयमै नबन्दा खेलाडी र फुटबलकर्मीको गन्तव्य पनि एन्फा कम्प्लेक्स र सशस्त्र प्रहरी बलका कामचलाउ मैदान बनेको छ । हाल रंगशाला निर्माणको कार्य अन्तिम चरणमा पुर्‍याउन राष्ट्रिय खेलकुद परिषद र युवा तथा खेलकुद मन्त्रालय लागि परेका छन् ।  

बाह्रखरीकर्मी सरिता खड्काको क्यामरामा कैद गरिएका केही तस्बिरहरु :