काठमाडौं । श्रम, रोजगार तथा सामाजिक सुरक्षा मन्त्रालयले विदेशमा काम गरी फर्किएर स्वदेशमा व्यवसाय गरी उद्यमी बनेका छजना युवालाई नगदसहित सम्मान गरेको छ ।
आज मन्त्रालयमा आयोजिक एक कार्यक्रमकाबीच श्रम मन्त्री गोकर्ण विष्टले उद्यमीहरुलाई सम्मान तथा पुरस्कृत गरेका हुन् । लामो समय वैदेशिक रोजगारीमा गएर स्वदेश फर्की व्यवसाय गरी रोजगारीसमेत सिर्जना गर्ने युवालाई हौसला स्वरुप सम्मान गरेको बताइएको छ । यसैबीच मन्त्री विष्टले देशलाई आर्थिक रुपमा बलियो र आत्मनिर्भर बनाउन युवा परिचालनमार्फत पुरानो सोंच र मानसिकता हटाउनु पर्ने बताए ।
सम्मानित हुनेमा नवराज पौड्याल, दिपक चापागाई, निरबहादुर राउत, एक बहादुर सिङ्ताङ्, मनोजकुमार भारती, शर्मिला अधिकारी र त्रिलोचा पनेरु रहेका छन् । पुरस्कृत छजनामध्य पाँच जनालाई ५०-५० हजार नगद पदान गरिएको छ भने नवराज पौड्याललाई उत्कृष्ट राष्ट्रिय उद्यमी पुरस्कार स्वरुप एक लाख नगर प्रदान गरिएको छ ।
रोजगारी सिर्जना, पूँजी लगानी, स्थानीय साधन, आयात प्रतिस्थापन, आयात प्रतिस्थापन तथा सामाजिक उत्तरदायित्व र योगदानको आधारमा उत्कृष्ट पुरस्कार घोषणा गरेको मन्त्रालयले जनाएको छ ।
यसैबीच सम्मानित उद्यमीहरुले मन्त्रालयले गरेको सम्मानले थप हौसला मिलेको बताएका छन् । विदेशमा गएर काम सिक्न र स्वदेशमा उद्यमी बन्न उनीहरुले आग्रह गरेका छन् ।