काठमाडौं । आइतबार सेयर बजारमा सामान्य सुधार आएको छ । साताको पहिलो कारोबार धितोपत्र बजारमा सेयर कारोबार मापन गर्ने नेप्से परिसूचक ०.९५ अंकले बढेको हो ।
नेप्से बढे पनि आइतबार कारोबार रकम भने उल्लेख्य हुन सकेन । बजारमा दिनभर २८ करोड ५२ लाख रुपैयाँको मात्र कारोबार भए । यसक्रममा १ सय ६१ कम्पनीका १० लाख ४२ हजार कित्ता सेयर किनबेच भए ।
आज कारोबार सुरू हुनेबित्तिकै उच्च सुधार आए पनि दिनभर परिसूचक स्थिर हुन नसक्दा ठूलो सुधार हुन सकेन । मौद्रिक नीति नआउनाले निम्त्याएको शंका उपशंकाले पनि बजारमा लगानीकर्ताको मनोबल कम रह्यो ।
नेप्से बढेको दिन कारोबारमा आएका ११ मध्ये ६ समूह उकालो लागे । बजार बढ्दा नागरिक लगानी कोषको सबैभन्दा उच्च अर्थात् २ करोड ५३ लाख रुपैयाँको सेयर कारोबार भयो ।
यसदिन महुली लघुवित्तका लगानीकर्ताले सर्वाधिक ९ प्रतिशत कमाउँदा मल्टिपर्पोज फाइनान्सको सेयर मूल्यमा सबैभन्दा बढी ८.२ प्रतिशतले घट्यो ।