काठमाडौं । श्रीलंकाका लागि नेपालका राजदूत प्रा. डा. विश्वम्भर प्याकुरेलले आफ्नै देशको प्रशासनिक नेतृत्वले राजदूतलाई जनावरजत्ति पनि महत्व नदिएकोले चित्त दुखेर राजीनामा दिएको बताएका छन् । बाह्रखरीसँग आइतबार बिहान श्रीलंकाबाट लामो कुराकानी गर्दै डा. प्याकुरेलले भने, ‘‘मैलै २४ महिनामा २४ वटा प्रतिवेदन बुझाएँ । इमेल लेखें । तर मन्त्रालयबाट कुनै पनि जवाफ आएन । त्यही भएर मैले डेढ महिनाअघि राजीनामा दिएको हुँ । अहिले स्वीकृत भएछ ।’’

उनले भने,‘‘मेरो कुनै पनि कुराको जवाफ नआएपछि नेपाली करदाताको रकमबापतको तलब खाएर बसिरहन मन लागेन । त्यसैले राजीनामा दिएको हुँ । म आफैंपनि केही काम गरेर नेपालमा बसिरहेको मान्छे हुँ । यस्तो ‘ह्युमिलिएसन’ सहेर बस्न मन लागेन ।’’

उनको राजीनामा गएको मंगलबार सरकारले स्वीकृत गरेको थियो । ‘‘मैले राजीनामा स्वीकृत भएको गएको शुक्रबार थाहा पाएँ । परराष्ट्रमन्त्री प्रदीप ज्ञवालीले मलाई पुनर्विचार गर्न आग्रह गर्नुभएको थियो । तर पुनर्विचार गर्न मन लागेन,’’ डा. प्याकुरेलले भने । 

आफूलाई श्रीलंकामा उच्च महत्व दिइएको जनाउँदै श्रीलंकाका विदेशमन्त्री आफूलाई भेट्न आउने गरेको र कर्मचारीहरुले पहिलोपटक यस्तो देखेको भनेर आश्चर्य मानेको उल्लेख गर्दै प्रा.डा. प्याकुरेलले आफ्नो देशमा भने कुनै कुराको सुनुवाइ नभएकोमा आफ्नो चित्त दुखेको जनाए ।

उनले श्रीलंकामा गएको अप्रिल २१ तारेखमा भएको बम विस्फोटको संसारभर चर्चा भएपनि त्यहाँ रहेका नेपालीको अवस्था के छ भन्ने बारेमा परराष्ट्र मन्त्रालयले कुनै चासो नदेखाएको उल्लेख गर्दै प्याकुरेलले भने, ‘‘बरु परराष्ट्रमन्त्रीले फोन गरेर के छ त्यहाँको अवस्था भनेर सोध्नुभयो । तर प्रशासनिक नेतृत्वले कुनै चासो दिएन ।’’

उनले आफूले सह्य नभएर राजीनामा दिएको चर्चा गर्दै अरु देशमा रहेका नेपाली राजदूतको हालत पनि त्यस्तै भएको बताए । आफूले कुटनीति रामै्र रुपमा चलेको होला भन्ने ठानेकोमा अहिले आफूले भोगेपछि वास्तविकता थाहा पाएको जनाए । उनले आफूसँगको कुराकानीमा अरु देशमा रहेका राजदूतले पनि त्यस्तै अप्ठेरो अनुभूति सुनाएको  तर उनीहरुले छोड्न नसकेको बताए ।

‘‘पहिला आइहालियो । मैले परराष्ट्रमन्त्रीलाई पहिला पनि अप्ठेरो छ भने मलाई फिर्ता बोलाउँदा पनि हुन्छ भनेको थिएँ । तर, फिर्ता बोलाइएन । तर काममा कुनै सहयोग नपाएपछि काम गर्न मन नलागेर छोडेको हुँ,’’ डा. प्याकुरेलले भने । 

आफूले चार दशकदेखि विश्वविद्यालयमा पढाएको उल्लेख गर्दै नेपालमा आएर अब स्वतन्त्र रुपमा काम गर्ने उल्लेख गरे । उनको भनाई थियो,‘‘परराष्ट्र मन्त्रालयमा न फोन उठ्छ, न इमेलको जवाफ पाइन्छ । यस्तो अवस्थामा ट्याक्स पेयरको पैसा खाएर अनि मर्सिडिज चढेर के बस्नु ?’’

आफू राजदूत हुनुभन्दा अघि पनि विश्व बैंकको सल्लाहकारको रुपमा काम गरेको उल्लेख गर्दै भने,‘‘मलाई नपुग्दो केही थिएन । तर त्यस्तै परेर आइयो । तर कुकुर बिरालोजत्तिको पनि मान्यता आफ्नै देशबाट नपाउँदा ग्लानि भएर राजीनामा दिएँ ।’’

डा. प्याकुरेल शेरबहादुर देउवा नेतृत्वको अघिल्लो सरकारका पालामा राजदूत नियुक्त भएका हुन् । त्यतिबेला नियुक्त भएमध्ये अन्यलाई यसअघि सरकारले फिर्ता गरेकोमा जापानका लागि नेपालका राजदूत प्रतिभा राणा र श्रीलंकाका लागि राजदूत प्याकुरेल मात्रै काम गर्दै आएका थिए । तर, प्याकुरेललाई असहयोग भएपछि उनले अहिले राजीनामा दिएका हुन् ।

प्रा.डा. प्याकुरेलले भने, ‘‘म ३१ जुलाई(साउन १५) गते स्वदेश फर्किनेछु । दरबारमार्गमा एउटा कार्यालय छ । फर्केर त्यहीँ काम गर्नेछु ।’’

तस्बिरः फेसबुकबाट