गएको साताको अन्तिमतिर अचानक बढेको वर्षापछि आएको बाढी, पहिरो र भेलले अहिलेसम्म करिब ४३ व्यक्ति मृत्युको शिकार भइसकेका छन् भने ३० जना जति हराइरहेका छन् । तर, बाढीसँगै प्रधानमन्त्री केपी शर्मा ओलीले सार्वजनिकरुपमा दिएको झुठो अभिव्यक्ति पनि बगेर गएको छ । बाढीको क्षतिको समाचारसँगै खोलामा सहर पसेको चर्चा यसपल्ट पुनः चर्चित बनेको छ । तर, पानी रोकिएको केही दिनमा नै सो चर्चा अर्को वर्ष बाढी घरघर नपसुन्जेलसम्म सेलाएर जान्छ । त्यस्तै प्रधानमन्त्रीले बोलेको झुठको चर्चा पनि बाढीले गर्दा यसपल्ट हराउँदै गएको छ र अर्को ठूलो झुठ बोलेको प्रमाणित नहुँदासम्म जनताको स्मृतिपटलबाट लोप हुँदै जानेछ ।
भारतबाट आएको तरकारीमा सरकारले विषादी परीक्षणगर्ने निर्णय गरेको केही दिन नबित्दै भारतीय दूतावासले औपचारिक पत्र लेखेरै भारतबाट परीक्षण प्रमाणपत्र लिएर आएका तरकारीलाई नेपालले पुनः परीक्षण गर्न र रोक लगाउन नपाउने दबाब दिएको थियो । नयाँ पत्रिकाले मंगलवारको अंकमा सिलसिलेवार रुपमा लेख्यो – जेठ १० गतेको मन्त्रिपरिषद्ले भारतसहित तेस्रो मुलुकबाट आयात गरिने तरकारी तथा फलफूलको नाकामै विषादी परीक्षण गरिने निर्णय गर्यो । असार ३ गते राजपत्रमा उक्त निर्णय प्रकाशित भएपश्चात सीमा नाकामा परीक्षण सुरुभयो । असार १४ गते भारतले सरकारलाई पत्र लेख्दै सो परीक्षण बन्द गर्नुपर्ने माग ग¥यो । परराष्ट्रले १५ असारमा कृषि र वाणिज्य मन्त्रालयलाई आवश्यकताअनुसार कार्यान्वयन गर्न पत्र लेख्यो । असार १७ मा कृषि मन्त्रालयले पूर्वाधारको कमी भन्दै विषादी परीक्षण नगर्ने निर्णय ग¥यो । असार १८ मा वाणिज्य मन्त्रालयले तत्कालका लागि विषादी परीक्षण नगर्ने प्रस्ताव मन्त्रिपरिषद्मा लग्यो । असार १९को मन्त्रिपरिषद्को बैठकले वाणिज्यको प्रस्ताव पारित गर्दै विषादी परीक्षण रोक्ने निर्णय गर्यो ।
मंगलवारको कान्तिपुरले मुख्य समाचार बनाउँदै लेख्यो – असार १४ गते नै आएको पत्रका बारेमा प्रधानमन्त्रीले असार २१ गते नेकपा (नेकपा)को संसदीय दलको बैठकमा परीक्षण रोक्न कुनै पत्र नआएको दाबी गरे । सो समाचारसँगै कान्तिपुरले भारतीय दूतावासबाट आएको पत्रको फोटो नै सार्वजनिक ग¥यो । हिमालय टाइम्सले पनि सोही दिन भारतीय दूतावासको पत्रका कारण परीक्षण रोकिएको समाचारलाई मुख्य बनाउँदै पत्रको सार प्रकाशित ग¥यो । बुधबारका पत्रिकाले पत्रका बारेमा सार्वजनिक गरेपछि प्रधानमन्त्री ओलीले आफूलाई सो पत्रको बारेमा कसैले नभनेको टिप्पणी गरे । सो टिप्पणीको विषयमा पनि कान्तिपुरले बिहीवार समाचार बनायो ।
बुधवारनै सर्वोच्च अदालतले अन्तरिम आदेश दिँदै सरकारले विषादी परीक्षण रोक्न लिएको निर्णय कार्यान्वयन नगर्न आदेश दियो । यो आदेशलाई पनि दैनिक पत्रिकाले महत्त्वकासाथ प्रकाशित गरे र राजधानीले सर्वोच्च अदालतको आदेशलाई मुख्य समाचार नै बनायो । कान्तिपुरले पनि त्यसलाई एक कोलमको मुख्य समाचारको रुपमा प्रकाशित ग¥यो । नागरिक, हिमालय टाइम्स तथा गोरखापत्रले पनि यस समाचारलाई स्थान दिए ।
शुक्रवारको पत्रिकामा प्रधानमन्त्रीले माफी मागेको विषयलाई लिएर ठूलो समाचार प्रकाशित भयो । हरेक साता बिहीबार प्रसारण हुने ‘जनतासँग प्रधानमन्त्री’ टेलिभिजन कार्यक्रममा प्रधानमन्त्रीले सो पत्रका बारेमा आफूलाई थाहा नदिइएको हुनाले आफू लज्जित भएको भन्दै क्षमायाचना गरे । सो समाचारलाई शुक्रवारको अन्नपूर्ण पोस्टले मुख्य समाचारको रुपमा प्रस्तुत गर्यो । सोही दिनको नागरिकले पनि त्यस विषयलाई मुख्य समाचारको स्थान दियो । कान्तिपुरले ‘प्रधानमन्त्री लज्जित –मन्त्रीहरू पन्छिए’ शीर्षकमा समाचार बनायो ।
शुक्रवारको अन्नपूर्ण पोस्टले सम्पादकीय लेख्दै प्रधानमन्त्रीलाई अनभिज्ञ किन राखिन्छ भन्ने प्रश्न गरेको छ । झुक्याएको या डुबाएको तर्क नियमित भइरहँदा शासनकर्ताकै क्षमतामा प्रश्न उठ्ने भन्दै पोस्टले लेखेको छ – शासनकर्ताले आफूलाई अनभिज्ञ राखिएको तर्क दिएर छुटकारा पाउँदैनन् । पोस्ट लेख्छ) आफूलाई झुक्याउनेलाई कारवाही गर्न सक्नुपर्छ होइन भने ‘नैतिकताको आधारमा आफैले पद छाड्नु’ पर्छ ।
तस्बिरः प्रधानमन्त्रीको सचिवालय