काठमाडौं । प्रत्यायोजित व्यवस्थापन तथा सरकारी आश्वासन समितिले गृहमन्त्री रामबहादुर थापालाई बोलाउने भएको छ । शान्तिसुरक्षा स्थापना गर्ने र आपराधिक कार्यमा संलग्न दोषीलाई कारवाही गर्ने आश्वासन पूरा नभएको सन्दर्भमा समितिले सोबारे बुझ्न गृहमन्त्री थापालाई बोलाउन लागेको हो ।
बिहीबार सिंहदरबारमा बसेको समितिको बैठकमा सभापति रामनारायण विडारीले निर्मला पन्तको हत्यारा अझै पक्राउ नपरिसकेको सन्दर्भ र पछिल्लो समय विप्लव नेकपाका कार्यकर्ता कुमार पौडेललगायतको हत्यापछिका सन्दर्भका बारेमा छलफल गर्न गृहमन्त्रीलाई समितिमा बोलाउन प्रस्ताव गरेका थिए । समितिमा गृहमन्त्री थापालाई बोलाउने सहमति भएपनि मिति भने तय भएको छैन । सकेसम्म यही आर्थीक वर्षभित्र गृहमन्त्री थापालाई बोलाउने समितिको तयारी छ ।
गृहमन्त्री थापाले संसदमा पन्तका हत्यारा छिट्टै पत्ता लगाउने बताएको महिनौं बितिसक्दा पनि अहिलेसम्म पत्ता लाग्न सकेको छैन । सांसदहरुले मुठभेडका नाममा नक्कली इन्काउन्टर गरिएको, सर्लाहीमा न्याया माग्दा शान्तिपूर्ण जुलुसमा गोली चलाइएको भन्दै प्रतिपक्षी दल कांग्रेस र राजपाले
संसदीय समिति बनाउन माग गरिरहेका बेला समितिले यसअघि आफैंले दिएका आश्वासन के भयो भनेर सोध्न गृहमन्त्रीलाई बोलाउने भएको हो ।
