काठमाडौं । प्रमुख प्रतिपक्षी दल नेपाली कांग्रेसका प्रवक्ता विश्वप्रकाश शर्माले प्रधानमन्त्री केपी शर्मा ओलीलाई गृहमन्त्रीको अभिव्यक्ति व्यक्तिगत हो कि सरकारको धारणा हो भनेर प्रश्न गरेका छन् । गृहमन्त्री रामबहादुर थापाले मंगलबार प्रतिनिधिसभा बैठकमा सर्लाही गोली काण्डका बारेमा प्रष्ट्याउँदै जनताको जीउधनको सुरक्षा र शान्ति सुव्यवस्था कायम गर्ने दायित्व निर्वाह गरेको अभिव्यक्ति दिएका थिए । 

‘‘सर्लाहीमा विप्लव समूहले आतंक मच्चाइरहेको थियो । चन्दा आतंक, जनप्रतिनिधिलाई धम्की दिने काम भइरहेको थियो । त्यहाँ जनप्रतिनिधिहरुकै मागअनुसार शान्ति सुव्यवस्था होस्, जनताको जीउधनको रक्षा होस् भन्ने मागअनुसार नै राज्यले कदम उठाएको हो,’’ उनले संसदलाई घटनाका बारेमा जानकारी दिँदै भनेका थिए । 

कांग्रेस प्रवक्ता शर्माले गृहमन्त्री थापाको सोही अभिव्यक्तिलाई लिएर प्रधानमन्त्री ओलीलाई ट्विटरमार्फत् प्रश्न गरेका छन्, ‘‘लोकतन्त्रको रक्षा गोली चलाएर नै हुने हो @PM_Nepal ? गृहमन्त्रीको अभिव्यक्ति व्यक्तिगत कि सरकारकै धारणा ?’’

उनले ओलीलाई द्वन्द्वकालीन अवस्थाको स्मरण गराउँदै अगाडि भनेका छन्, ‘‘उसबेलाको ‘प्रजातन्त्र’ ले गोली चलाएर नै आफ्नो रक्षा चाहेको भए थुप्रै हुरी, चट्याङ र बादलहरु बेपत्ताको लिस्टमा पुग्ने थिएनन् र ? सहादतको सूचीमा भलै हामी कयौंको नाम हुन्थ्यो !’’