राजनीति
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वमा बन्ने सरकारमा मन्त्रीको संख्या ४० नाघ्न सक्ने नेताहरूले बताएका छन् ।
कांग्रेस, नेकपा माओवादी केन्द्र, मधेसवादी दल, राप्रपा, साना दल सबैलाई मिलाउँदा राज्यमन्त्री समेत बनाउनुपर्ने देखिएको न्युनतम साझा कार्यक्रम बनाउन लागिपरेका एक नेताले बताए ।
“पार्टीमा गुट पनि हेर्नुपर्ने अवस्था छ,” ती नेताले भने,“त्यसमाथि सरकारमा सहभागी हुन चाहने दलको संख्या पनि अहिलेसम्म धेरै देखिएको छ ।”
उनका अनुसार कांग्रेस, नेकपा माओवादी केन्द्र, मधेसवादी दल, राप्रपा, साना दल सबैलाई मिलाउनुपर्ने र पार्टीमा पनि गुट मिलाउनुपर्ने हुँदा मन्त्रीको संख्या ठुलो हुने देखिएको छ ।
मधेसी मोर्चामा आवद्ध राजनीतिक दल सरकारमा सहभागी हुँदा मन्त्रीको संख्या झनै ठुलो हुन सक्ने देखिएको उनले बताए ।
न्यूनतम साझा कार्यक्रम कार्यक्रम बनाउन कांग्रेसका विमलेन्द्र निधी, रमेश लेखक र रामशरण महत लागिपरेका छन् भने माओवादीका तर्फबाट कृष्ण बहादुर महरा र वर्षमान पुन लागिपरेका छन् ।
एकले अर्काको मन्त्रालयमा हस्तक्षेप नगर्ने र विवाद नहुने गरी मन्त्रालयको बाँडफाँटमा लागेको स्रोतले बतायो ।
तर कांग्रेस र नेकपा माओवादी केन्द्रमा मन्त्री छान्नै सकस भएको छ । आकांक्षी बढी भएपछि मन्त्री छान्नै सकस भएको नेताहरूले जनाएका छन् ।
माओवादी केन्द्रले मन्त्री छान्ने जिम्मा अध्यक्ष पुष्पकमल दाहाल प्रचण्डलाई दिएको छ भने कांग्रेसमा भने गुटगत रूपमा मात्रै छलफल चलेको कांग्रेसका एक नेताले बताए ।
यसैबीच राप्रपाले नयाँ बन्ने सरकारमा सहभागी हुने बताएको छ । दुई मन्त्रालय लिएर सरकारमा जाने विषयमा छलफल चलेको राप्रपा सह–प्रवक्ता किरण गिरीले जानकारी दिए ।
प्रकाशित मिति: शुक्रबार, साउन १४, २०७३ १४:५४
प्रतिक्रिया दिनुहोस्