काराकास । भेनेजुएलाका राष्ट्रपति निकोलस मादुरोको हत्याको षडयन्त्रमा लागेको भन्ने आरोप लागेका एक जना नाभी क्याप्टेनको मृत्यु भएको घटनालाई लिएर विपक्षी नेता जुआन गुआइडोले निन्दा गरेका छन् । गुआइडोले सो घटनाको छानबिन गर्न समेत माग गरेका छन् ।
नाभी क्याप्टेन ४९ वर्षिय राफेल अकोस्टा लगायतका ६ जना प्रहरी र सिपाहीहरुलाई गएको बुधबार पक्राउ गरिएको थियो । उनीहरुलाई मादुरो विरुद्धको षडयन्त्रमा लागेको भन्ने आरोपमा पक्राउ गरिएको हो । उनीहरुलाई देशद्रोहको अभियोग लगाइएको थियो । अकोस्टा गएको शुक्रबार अदालतमा हाजीर भएका थिए तर प्रक्रिया शुरु हुने बेलामा उनी बेहोस भएका थिए । उनलाई राजधानीको सैनिक अस्पतालमा लगिएकोमा शनिबार बिहान उनको मृत्यु भएको भेनेजुएलाको रक्षा मन्त्रालयले एक वक्तव्य जारी गरी जनाएको छ । आवश्यक स्वास्थ्य सेवा उपलब्ध गराउँदा गराउँदैपनि उनको मृत्यु भएको रक्षा मन्त्रालयको वक्तव्यमा उल्लेख गरिएको छ ।
उता विपक्षी नेता गुआइडोले भने अकोस्टाको बारेमा पाइएको एउटा भिडियोमा उनलाई नृशंस यातना दिएको देखिएको जनाएका छन् ।
मृत्यु भएका अकोस्टाकी पत्नी वालेस्का पेरेजले कोलम्बिया टिभीसँगको कुराकानीमा आफ्ना पतिको मृत्यु यातनाबाट भएको आरोप लगाएकी छन् । भेनेजुएलाको सरकारले अकोस्टाको मृत्युको बारेमा छानबिन गर्ने जनाएको छ । अहिले भेनेजुएलामा ७०० मानिसलाई राजनीतिक कारणले थुनामा राखिएको जनाइएको छ । (बीबीसीबाट)
