धादिङ । माथिबाट आएको लेदो सडकमा जमेपछि अवरुद्ध भएको पृथ्वी राजमार्ग केहीबेरअघिदेखि खुलेको छ । धादिङको गल्छी गाउँपालिका–६ बैरेनीबजारबाट महेशदोभान बजारसम्म एक किलोमिटर सडकमा बालुवा र माटोको लेदो जमेको थियो ।
लेदोमा केही सवारीसाधन समेत फसेका थिए ।
सडकभन्दा माथि बालुवा निकालिएको छ । बालुवा निकालिएपछि राति परेको वर्षाका कारण लेदो सडकसम्म आएको हो । राजमार्ग माथिबाट खनिएको सडकलाई व्यवस्थित गर्न नसक्दा सडक खन्दा निस्किएको लेदो राजमार्गसम्म आएपछि राजमार्ग बिहान २ बजेदेखि अवरुद्ध भएको बैरेनीबजारका व्यवसायी नरेश खतिवडाले बताए ।
प्रहरीले दिएको जानकारीअनुसार अवरुद्ध सडक सुचारू भएको छ । तर दुवैतर्फ सवारी साधनको चापले जाम भने कायमै छ । सडक अवरुद्ध भएपछि यसलाई हटाउन बालुवा व्यवसायी र गाउँपालिकाले राजमार्गमा डोजर लगाएका थिए ।