एजेन्सी । आईसीसी एकदिवसीय विश्वकप क्रिकेटमा न्युजिल्याण्डले पाकिस्तानलाई २३८ रनको मध्यम लक्ष्य दिएको छ । इड्जबेस्टोनमा टस जितेर पहिले ब्याटिङ गरेको न्युजिल्याण्डले निर्धारित ५० ओभरमा ६ विकेट गुमाउँदै २३७ रन पूरा गर्यो ।
न्युजिल्याण्डका लागि जिम्मि निशम र कोलिन डी ग्राण्डहोमले अर्धशतकीय पारी खेले । ११२ बल खेलेका निशमले ५ चौका र ३ छक्काको सहयोगमा ९७ रनको योगदान गरे । ७१ बल खेलेका डी ग्राण्डहोमले ६ चौका र १ छक्काको सहयोगमा ६४ रन पूरा गरे ।
न्युजिल्याण्डका लागि कप्तान केन विलियम्सनले ४४ रन जोड्दा कोलिन मुन्रोले १२ रन जोडे । बलिङतर्फ पाकिस्तानका लागि शाहीन अफरीदीले सर्वाधिक तीन विकेट लिए । १० ओभर बलिङ गरेका उनले तीन मेडेन ओभर फ्याक्दै मात्र २८ रन दिए । त्यस्तै मोहम्मद आमिर र शादाब खानले समान एक-एक विकेट लिए ।