काठमाडौं । असार १ गतेबाट उपत्यकामा सञ्चालनमा हुने भनिएको रात्रिकालीन बस सेवा सञ्चालनमा आउन सकेको छैनन् । आन्तरिक तयारी नपुगेको भन्दै यातायात व्यवस्था विभागले रात्रिकालीन सब सेवा सञ्चालन गर्न नसकिने बताएको छ । 

हाल उपत्यकामा राति ८ बजेदेखि सार्वजनिक सवारी साधन नचल्नाले यात्रुलाई हुने समस्या समाधानका लागि विभागले असार १ बाट रात्रिकालीन बस सेवा सञ्चालन गर्ने तयारी गरेको थियो । 

यात्रुको संख्या उल्लेख्य नहुने, सुरक्षा चुनौती, ट्राफिक नियम कार्यान्वयन र भाडा शुल्कबारे पर्याप्त तयारी नपुगेको भन्दै विभागले तत्कालका लागि उक्त योजना लागु नगर्ने बताएको छ । 

“उपत्यकामा रात्रिकालीन बस चलाउने तयारी करिब पूरा भइसकेको थियो । तर थप अध्ययन नगरी बस चलाउन नसकिएको हो,” विभागका निर्देशक तथा सूचना अधिकारी तीर्थराज खनालले बाह्रखरीसँग भने ।

महानगरीय ट्राफिक प्रहरी महाशाखाले विभागले सञ्चालन गर्ने भनेको रात्रिकालीन बस राति ९ बजेदेखि १२ बजेसम्म सञ्चालन हुनसक्ने बताउँदै आएको थियो । विभागले भने यात्रुको संख्यालाई हेरेर बिहान ५ बजेसम्म नै सार्वजनिक बस सेवा सञ्चालन गर्न सकिने बताएको थियो ।

“विभागले ल्याएको यो योजना के कारणले कार्यान्वयन नगरिएको हो, यसबारे हामीलाई जानकारी भएन । रात्रिबस सञ्चालनको योजना राम्रै थियो तर पछिल्लो समय आएर के समस्या देखिएको हो यसबारे हामीलाई जानकारी छैन,” महाशाखाका प्रवक्ता, प्रहरी उपरीक्षक रविकुमार पौडेलले भने ।