काठमाडौं । भौतिक पूर्वाधार तथा यातायातमन्त्री रघुवीर महासेठले सरकारको काममा बाधा पुर्याउने उद्देश्यका साथ सरकार पुनर्गठनको हल्ला फिँजाइएको बताएका छन् । रिपोर्टर्स क्लबको साक्षात्कारमा उनले सरकारलाई कमजोर बनाउनको पुनर्गठनको अफवाह फैलाइएको बताए । 

सरकारले राम्रा कामहरु गरेको भन्दै उनले सरकारलाई कमजोर पार्न विभिन्न वहानामा चौतर्फी घेरावन्दी गर्न खोज्नेहरु सफल नहुने दाबी गरे । उनले भागवण्डाको लागि पार्टी एकता नभएकाले वर्तमान सरकारकै निरन्तरता हुने दाबी पनि गरे । उनले हुलाकी राजमार्ग, मदन भण्डारी राजमार्ग, मध्यपहाडी राजमार्ग र महेन्द्र राजमार्ग विस्तार लगायतका महत्वपूर्ण  आयोजनाहरु निर्धारित समय अगावै सम्पन्न गरिने दाबी गरे ।