काठमाडौं । ‘गलबन्दी’ बोलको लोकगीतलाई लिएर केही समयदेखि विवाद गरिरहेका गायहरु शम्भु राई र प्रकाश सपूतबीच सहमति भएको छ । प्रतिलिपि अधिकार रजिष्टारको कार्यालयमा छलफल गरेर आज उनीहरुले विवाद टुंग्याउने सहमति गरेका हुन् । कार्यालयले सोमबार उनीहरुलाई मिल्नको लागि तीन दिनको समय दिएको थियो । राई र सपूतबीच ‘गलबन्दी’ गीतमा क्रिएसन शम्भु राई, रिक्रिएसन बाइ प्रकाश सपूत राख्ने सहमति भएको बताइएको छ । प्रकाशले राईलाई सम्मान गर्ने र उनकै गीत सुनेर प्रभावित भएको बताएका छन् भने शम्भु राईले पनि चित्त बुझाएका छन् । 

दुुई जनाबीच आर्थिक वा अन्य कुनै पनि प्रकारको लेनदेन नभएको प्रतिलिपी अधिकार रजिष्टारको कार्यालयका रजिष्टार प्रकाश आचार्यले जानकारी दिए । सपूतको गीत ‘गलबन्दी’ आफ्नो गीत ‘आऊ नाचौं साथी हो’सँग हुबहु मिलेको भन्दै राईले कपिराइटमा मुद्दा दर्ता गरेपछि रजिष्टारको कार्यालयले छलफलका लागि बोलाएको थियो । 

‘गलबन्दी’ सबैभन्दा छोटो समयमा युट्युबमा करोड ‘भ्युज’ पाएको गीत हो भने ‘आउ नाचौं साथी हो’ शम्भु राईले ०४८ सालमा रेकर्ड गरेको गीत हो ।